na roye wo jo andoh-gin aisa bhi hota hai

na roye vo jo andoh-gīñ aisā bhī hotā hai

na taḌpe dard-e-dil vaalā kahīñ aisā bhī hotā hai

vafā karte haiñ vā'da ye hasīñ aisā bhī hotā hai

mukar bhī jaate haiñ kah kar kahīñ aisā bhī hotā hai

kahā jab un se ik din be-bulā.e tum chale aao

to bole muskurā kar vo kahīñ aisā bhī hotā hai

hamīñ haiñ vo gale meñ jis ke qātil terī bāñheñ thiiñ

usī gardan pe ab hai teġh kahīñ aisā bhī hotā hai

kabhī the tum raqīboñ meñ ab aa.e mere qaabū meñ

kahīñ vaisā bhī hotā hai kahīñ aisā bhī hotā hai

kabhī aisā bhī hotā hai ki āñkhoñ se rahe ojhal

kabhī dil meñ ho vo ḳhalvat-nashīñ aisā bhī hotā hai

falak kī tarah to bhī pīstī hai marne vāloñ ko

sitam ahl-e-fanā par ai zamīñ aisā bhī hotā hai

ḳhabar letā nahīñ to case kī martā hai vo tujh par

batā ai laila-e-mahmil-nashīñ aisā bhī hotā hai

na roye wo jo andoh-gin aisa bhi hota hai

na taDpe dard-e-dil wala kahin aisa bhi hota hai

wafa karte hain wa'da ye hasin aisa bhi hota hai

mukar bhi jate hain kah kar kahin aisa bhi hota hai

kaha jab un se ek din be-bulae tum chale aao

to bole muskura kar wo kahin aisa bhi hota hai

hamin hain wo gale mein jis ke qatil teri banhen thin

usi gardan pe ab hai tegh kahin aisa bhi hota hai

kabhi the tum raqibon mein ab aae mere qabu mein

kahin waisa bhi hota hai kahin aisa bhi hota hai

kabhi aisa bhi hota hai ki aankhon se rahe ojhal

kabhi dil mein ho wo KHalwat-nashin aisa bhi hota hai

falak ki tarah to bhi pisti hai marne walon ko

sitam ahl-e-fana par ai zamin aisa bhi hota hai

KHabar leta nahin to case ki marta hai wo tujh par

bata ai laila-e-mahmil-nashin aisa bhi hota hai