teri baKHshi hui har musibat hum ko rahat se kuchh kam nahin hai

terī baḳhshī huī har musībat ham ko rāhat se kuchh kam nahīñ hai

maut hai maut vo zindagī bhī jis kā hāsil terā ġham nahīñ hai

yuuñ to piine ko ye pī rahe haiñ raqs meñ jām-o-mīnā hai lekin

kaif-e-bāda se mahrūm haiñ sab aaj saaqī to braham nahīñ hai

ham ne maanā bahār aa ga.ī hai koī ḳhatra nahīñ ab ḳhizāñ kā

ahl-e-gulshan ye kyā mājrā hai rañg par kyuuñ ye mausam nahīñ hai

mahr kā ye karishma to dekho āsmāñ ban gayā sehn-e-gulshan

aisā ma.alūm hotā hai jaise chāñd taare haiñ shabnam nahīñ hai

nā-mukammal abhī hai fasāna josh girya kahīñ thak na jaanā

merā dāman to bhīgā hai lekin us kā dāman abhī nam nahīñ hai

raushnī-e-sahar kī tamannā ab bhalā kyā karūñgā maiñ 'kashfī'

mere dil meñ hai us kī tajallī mujh ko kHauf-e-shab-e-ġham nahīñ hai

teri baKHshi hui har musibat hum ko rahat se kuchh kam nahin hai

maut hai maut wo zindagi bhi jis ka hasil tera gham nahin hai

yun to pine ko ye pi rahe hain raqs mein jam-o-mina hai lekin

kaif-e-baada se mahrum hain sab aaj saqi to braham nahin hai

hum ne mana bahaar aa gai hai koi KHatra nahin ab KHizan ka

ahl-e-gulshan ye kya majra hai rang par kyun ye mausam nahin hai

mahr ka ye karishma to dekho aasman ban gaya sehn-e-gulshan

aisa malum hota hai jaise chand tare hain shabnam nahin hai

na-mukammal abhi hai fasana josh girya kahin thak na jaana

mera daman to bhiga hai lekin us ka daman abhi nam nahin hai

raushni-e-sahar ki tamanna ab bhala kya karunga main 'kashfi'

mere dil mein hai us ki tajalli mujh ko kHauf-e-shab-e-gham nahin hai