بگڑ بیٹھے ذرا سی دل لگی میں

بگڑ بیٹھے ذرا سی دل لگی میں

ہٹو بھی روئے دیتے ہو ہنسی میں

ہمارے دل کے آئینے میں دیکھو

لگے ہیں لعل کیا اس آرسی میں

تم اپنے پرتو عارض کی ضو سے

لگا دو جوڑمہ کی چاندنی میں

عجب کیا اس میں ہے آئے نہ آئے

کہ ہے اک سانس ہی تو آدمی میں

خدا سے بخشواؤ گے ہمیں کیا

حسینوں کام آؤ میکشی میں

ہمارا خرمن دل جل گیا آہ

بھری تھیں بجلیاں تیری ہنسی میں

قمرؔ ہم اور تم رشک قمر ہو

یہ دونوں چاند چمکیں چاندنی میں