choT jis ne ishq ki khai nahin

choT jis ne 'ishq kī khaa.ī nahīñ

us ne goyā zindagī paa.ī nahīñ

mil sakegā kaise manzil kā nishāñ

jab ki shauq-e-jāda-e-paimā.ī nahīñ

jo muqaddar meñ thā vo ho kar rahā

ek bhī tadbīr kaam aa.ī nahīñ

kyā kaheñ ham maġhribī tahzīb ko

us kī koī bhī adā bhaa.ī nahīñ

dil-rubā.ī jānte haiñ vo magar

dil-navāzī-o-dil-ārā.ī nahii.

daur-e-hāzir ke tamaddun ko salām

bhaa.ī kā hamdard ab bhaa.ī nahīñ

terī peshānī bhalā kis kaam kī

jab tujhe zauq-e-jabīñ-sā.ī nahīñ

hai vahī kibr-o-ġhurūr-o-tamkanat

kaun kahtā hai ki dārā.ī nahii.

choT jis ne 'ishq ki khai nahin

us ne goya zindagi pai nahin

mil sakega kaise manzil ka nishan

jab ki shauq-e-jada-e-paimai nahin

jo muqaddar mein tha wo ho kar raha

ek bhi tadbir kaam aai nahin

kya kahen hum maghribi tahzib ko

us ki koi bhi ada bhai nahin

dil-rubai jaante hain wo magar

dil-nawazi-o-dil-arai nahi

daur-e-hazir ke tamaddun ko salam

bhai ka hamdard ab bhai nahin

teri peshani bhala kis kaam ki

jab tujhe zauq-e-jabin-sai nahin

hai wahi kibr-o-ghurur-o-tamkanat

kaun kahta hai ki darai nahi