چوٹ جس نے عشق کی کھائی نہیں

چوٹ جس نے عشق کی کھائی نہیں

اس نے گویا زندگی پائی نہیں

مل سکے گا کیسے منزل کا نشاں

جب کہ شوق جادہ پیمائی نہیں

جو مقدر میں تھا وہ ہو کر رہا

ایک بھی تدبیر کام آئی نہیں

کیا کہیں ہم مغربی تہذیب کو

اس کی کوئی بھی ادا بھائی نہیں

دلربائی جانتے ہیں وہ مگر

دلنوازی و دل آرائی نہیں

دور حاضر کے تمدن کو سلام

بھائی کا ہمدرد اب بھائی نہیں

تیری پیشانی بھلا کس کام کی

جب تجھے ذوق جبیں سائی نہیں

ہے وہی کبر و غرور و تمکنت

کون کہتا ہے کہ دارائی نہیں