shab-e-asra naqab uTTha jo ruKH se na-gahan tera

shab-e-asrā naqāb uTThā jo ruḳh se nā-gahāñ terā

to zāhir ho gayā 'ālam pe rāz-e-kun-fakāñ terā

rahegā ai dil-e-muztar Thikānā ab kahāñ terā

muḳhālif hai zamīñ terī 'adū se āsmāñ terā

sambhal ai bulbul-e-nādāñ 'adū hai bāġhbāñ terā

chaman meñ shāḳh-e-gul par kyā rahegā āshiyāñ terā

kalīsā meñ haram meñ dahr meñ terā hī charchā hai

magar hai fil-haqīqat ḳhāna-e-dil āstāñ terā

jo tū chāhe le bevafā yā bā-vafā ai but

ye terī zehniyat hai vahm terā hai gumāñ terā

ye kah kar bijliyāñ girtī raheñ mere nasheman par

hameñ gulshan meñ rakhnā hī nahīñ hai āshiyāñ terā

mire sajde ġhalat hoñ maiñ to qaa.il hī nahīñ is kā

mirī nazroñ meñ rahtā hai hamesha āstāñ terā

dikhā itnī na be-tābī maqām-e-sabr hai ai dil

ḳhudā jaane liyā jā.egā kab tak imtihāñ terā

nigāh-e-'ishq meñ hai ek duniyā ho ki 'uqbā ho

yahāñ bhī āstāñ terā vahāñ bhī āstāñ terā

'araq-ālūda hai shabnam se ai gul kyuuñ jabīñ terī

chaman meñ kaun dekhe manzar-e-nuz.hat-chakāñ terā

har ek manzil pe DhūñDhā hai tujhe ai yūsuf-e-sānī

pata miltā nahīñ hai kārvāñ dar kārvāñ terā

bahut se haiñ tujhe dair-o-haram meñ DhūñDhne vaale

na ye hai āstāñ terā na vo hai āstāñ terā

bajā.e ḳhud na thā dilchasp zikr-e-dozaḳh-o-jannat

qayāmat Dah gayā vā'iz magar tarz-e-bayāñ terā

jise hāsil ho pā-bosī zamīñ kyā āsmāñ hai vo

ki har mahfil meñ koī bhī na niklā rāz-dāñ terā

tamannā-e-shahādat rakhne vaale aa.egā ik din

karegī faisla 'qātil' kī teġh-e-kHūñchakāñ terā

shab-e-asra naqab uTTha jo ruKH se na-gahan tera

to zahir ho gaya 'alam pe raaz-e-kun-fakan tera

rahega ai dil-e-muztar Thikana ab kahan tera

muKHalif hai zamin teri 'adu se aasman tera

sambhal ai bulbul-e-nadan 'adu hai baghban tera

chaman mein shaKH-e-gul par kya rahega aashiyan tera

kalisa mein haram mein dahr mein tera hi charcha hai

magar hai fil-haqiqat KHana-e-dil aastan tera

jo tu chahe le bewafa ya ba-wafa ai but

ye teri zehniyat hai wahm tera hai guman tera

ye kah kar bijliyan girti rahen mere nasheman par

hamein gulshan mein rakhna hi nahin hai aashiyan tera

mere sajde ghalat hon main to qail hi nahin is ka

meri nazron mein rahta hai hamesha aastan tera

dikha itni na be-tabi maqam-e-sabr hai ai dil

KHuda jaane liya jaega kab tak imtihan tera

nigah-e-'ishq mein hai ek duniya ho ki 'uqba ho

yahan bhi aastan tera wahan bhi aastan tera

'araq-aluda hai shabnam se ai gul kyun jabin teri

chaman mein kaun dekhe manzar-e-nuzhat-chakan tera

har ek manzil pe DhunDha hai tujhe ai yusuf-e-sani

pata milta nahin hai karwan dar karwan tera

bahut se hain tujhe dair-o-haram mein DhunDhne wale

na ye hai aastan tera na wo hai aastan tera

bajae KHud na tha dilchasp zikr-e-dozaKH-o-jannat

qayamat Dah gaya wa'iz magar tarz-e-bayan tera

jise hasil ho pa-bosi zamin kya aasman hai wo

ki har mahfil mein koi bhi na nikla raaz-dan tera

tamanna-e-shahadat rakhne wale aaega ek din

karegi faisla 'qatil' ki tegh-e-kHunchakan tera