jo niyat-e-mai kar leta hai phir us pe sharab barasti hai

jo nīyat-e-mai kar letā hai phir us pe sharāb barastī hai

mai-ḳhāne ke zarre meñ saaqī kī nazar kī mastī hai

qassam-e-azal kā taḳhmīna ye kasrat vaale kyā jāneñ

mai kitnī rakhī hai shīshoñ meñ mai-ḳhvāroñ kī kitnī bastī hai

jhuk jaate haiñ saaqī ke dar par mar miTte haiñ qatre-qatre par

tauhīd ke bāda-parastoñ meñ kis shaan kī bāda-parastī hai

añgusht-numā.ī duniyā kī rusvā-e-mohabbat sahte haiñ

ye daur se apne rote haiñ maḳhlūq ḳhudā kī hastī hai

rabbe-arenī ke nā're kis sūkhā dil ne lagā.e haiñ

kyuuñ jalve tumhāre arzāñ haiñ kyuuñ jins-e-mohabbat sastī hai

ik abr-e-karam ik din umDā duniyā kī nigāhoñ ne dekhā

fārān se saare 'ālam par rahmat kī phuvār barastī hai

jo baat hai lab pe aatī hai ye dil kī haqīqat hai 'qātil'

bechainī kā ye ik dariyā hai armānoñ kī ye ik bastī hai

jo niyat-e-mai kar leta hai phir us pe sharab barasti hai

mai-KHane ke zarre mein saqi ki nazar ki masti hai

qassam-e-azal ka taKHmina ye kasrat wale kya jaanen

mai kitni rakhi hai shishon mein mai-KHwaron ki kitni basti hai

jhuk jate hain saqi ke dar par mar miTte hain qatre-qatre par

tauhid ke baada-paraston mein kis shan ki baada-parasti hai

angusht-numai duniya ki ruswa-e-mohabbat sahte hain

ye daur se apne rote hain maKHluq KHuda ki hasti hai

rabbe-areni ke na're kis sukha dil ne lagae hain

kyun jalwe tumhaare arzan hain kyun jins-e-mohabbat sasti hai

ek abr-e-karam ek din umDa duniya ki nigahon ne dekha

faran se sare 'alam par rahmat ki phuwar barasti hai

jo baat hai lab pe aati hai ye dil ki haqiqat hai 'qatil'

bechaini ka ye ek dariya hai armanon ki ye ek basti hai