qayamat hai kis ki uThai hui

qayāmat hai kis kī uThā.ī huī

ye aafat hai sab un kī laa.ī huī

akelī lahad meñ hai aa.ī huī

qayāmat bhī hai khelī khaa.ī huī

uḌā.eñge vo ḳhaak mere liye

bure vaqt un se safā.ī huī

jo mehñdī lagānā nahii. jānte

ye hai aag un kī lagā.ī huī

tirī bazm meñ ham bure kyuuñ bane

vo kyā aisī ham se burā.ī huī

ye kaahe ko aatī mirī qabr meñ

qayāmat hai un kī satā.ī huī

na kaam aa.e naale na dil kī taḌap

kisī kī na un tak rasā.ī huī

huā kyā paḌā ā.īna beach meñ

ye thā kaun kis se laḌā.ī huī

hañsī meñ uḌāte vo kyā merī baat

kaho dab ga.ī lab tak aa.ī huī

na kahnā adū se koī dil kī baat

jahāñ muñh se niklī parā.ī huī

adū ko dam-e-zabh vo laa.e saath

use aa ga.ī merī aa.ī huī

dikhāo nigah kī jo tum shoḳhiyāñ

phire barq bhī tilmilā.ī huī

nahii. āshiq-e-tūr dil kī lagī

bujhegī na un kī lagā.ī huī

ḳhudā apne bandoñ kī suntā agar

tū sunte butoñ kī ḳhudā.ī huī

mirī qabr par aake mai-kash piyeñ

ghaTā hasratoñ kī hai chhā.ī huī

yahī to marī jaan kā hai adū

sab aafat hai us dil kī laa.ī huī

uḌaao 'riyāz' uTh ke botal ke kaag

ghaTā kab se hai aaj chhā.ī hoī

qayamat hai kis ki uThai hui

ye aafat hai sab un ki lai hui

akeli lahad mein hai aai hui

qayamat bhi hai kheli khai hui

uDaenge wo KHak mere liye

bure waqt un se safai hui

jo mehndi lagana nahi jaante

ye hai aag un ki lagai hui

teri bazm mein hum bure kyun bane

wo kya aisi hum se burai hui

ye kahe ko aati meri qabr mein

qayamat hai un ki satai hui

na kaam aae nale na dil ki taDap

kisi ki na un tak rasai hui

hua kya paDa aaina beach mein

ye tha kaun kis se laDai hui

hansi mein uDate wo kya meri baat

kaho dab gai lab tak aai hui

na kahna adu se koi dil ki baat

jahan munh se nikli parai hui

adu ko dam-e-zabh wo lae sath

use aa gai meri aai hui

dikhao nigah ki jo tum shoKHiyan

phire barq bhi tilmilai hui

nahi aashiq-e-tur dil ki lagi

bujhegi na un ki lagai hui

KHuda apne bandon ki sunta agar

tu sunte buton ki KHudai hui

meri qabr par aake mai-kash piyen

ghaTa hasraton ki hai chhai hui

yahi to mari jaan ka hai adu

sab aafat hai us dil ki lai hui

uDao 'riyaz' uTh ke botal ke kag

ghaTa kab se hai aaj chhai hoi