hazaron bar azal se qibla-e-ahl-e-jahan badla

hazāroñ baar azal se qibla-e-ahl-e-jahāñ badlā

merī lauh-e-jabīñ badlī na un kā āstāñ badlā

na paayā aaj tak ham ne surāġh-e-manzil-e-hastī

kabhī ye kārvāñ badlā kabhī vo kārvāñ badlā

na chhalkā jaam phir koī na phir khaḌkā koī sāġhar

jo saaqī chal diyā uTh kar to mahfil kā samāñ badlā

na chhoḌā mutma.in un ko bhī tāsīr-e-mohabbat ne

yahāñ āñkhoñ se ḳhuuñ Tapkā to rañg-e-ruḳh vahāñ badlā

vo jab tak muskurāte haiñ zamāna muskurātā hai

samajh lo phir qiyāmat hai mizāj un kā jahāñ badlā

kahāñ maiñ aur kahāñ zauq-e-navāsanjī magar 'nashtar'

jumūd apnā ba-hukm-e-afqar-e-mo.ajiz bayāñ badlā

hazaron bar azal se qibla-e-ahl-e-jahan badla

meri lauh-e-jabin badli na un ka aastan badla

na paya aaj tak hum ne suragh-e-manzil-e-hasti

kabhi ye karwan badla kabhi wo karwan badla

na chhalka jam phir koi na phir khaDka koi saghar

jo saqi chal diya uTh kar to mahfil ka saman badla

na chhoDa mutmain un ko bhi tasir-e-mohabbat ne

yahan aankhon se KHun Tapka to rang-e-ruKH wahan badla

wo jab tak muskuraate hain zamana muskuraata hai

samajh lo phir qiyamat hai mizaj un ka jahan badla

kahan main aur kahan zauq-e-nawasanji magar 'nashtar'

jumud apna ba-hukm-e-afqar-e-moajiz bayan badla