ہزاروں بار ازل سے قبلۂ اہل جہاں بدلا

ہزاروں بار ازل سے قبلۂ اہل جہاں بدلا

میری لوح جبیں بدلی نہ ان کا آستاں بدلا

نہ پایا آج تک ہم نے سراغ منزل ہستی

کبھی یہ کارواں بدلا کبھی وہ کارواں بدلا

نہ چھلکا جام پھر کوئی نہ پھر کھڑکا کوئی ساغر

جو ساقی چل دیا اٹھ کر تو محفل کا سماں بدلا

نہ چھوڑا مطمئن ان کو بھی تاثیر محبت نے

یہاں آنکھوں سے خوں ٹپکا تو رنگ رخ وہاں بدلا

وہ جب تک مسکراتے ہیں زمانہ مسکراتا ہے

سمجھ لو پھر قیامت ہے مزاج ان کا جہاں بدلا

کہاں میں اور کہاں ذوق نواسنجی مگر نشترؔ

جمود اپنا بہ حکم افقر معجز بیاں بدلا