jalwa-ru-e-nabi nur-e-basar ho jae

jalva-rū-e-nabī nūr-e-basar ho jaa.e

mardum-e-dīda-e-arbāb nazar ho jaa.e

ik zarā terī tavajjoh jo idhar ho jaa.e

dil sanam-ḳhāna hai allāh kā ghar ho jaaye

rāt-din barq sar-e-tūr kā jalva dekhūñ

merī jānib nazar-e-lutf agar ho jaaye

dar pe rakhtā huuñ tire kaash tirī Thokar se

sarfarāz aaj mirā kāsa-e-sar ho jaaye

tere bīmār yahī karte haiñ har sub.h du'ā

aaj kuchh aur fuzūñ dard-e-jigar ho jaaye

hasrat-e-dīd ne dam rok liyā āñkhoñ meñ

tum jo aao to āhañg-e-safar ho jaa.e

jis taraf le ke chaleñ log janāza merā

kaash terā bhī usī samt guzar ho jaaye

un kī tā'rīf meñ jo she'r kahūñ meñ 'fazlī'

gosh vaalā ke qarīñ jaa.e guhar ho jaaye

jalwa-ru-e-nabi nur-e-basar ho jae

mardum-e-dida-e-arbab nazar ho jae

ek zara teri tawajjoh jo idhar ho jae

dil sanam-KHana hai allah ka ghar ho jaye

raat-din barq sar-e-tur ka jalwa dekhun

meri jaanib nazar-e-lutf agar ho jaye

dar pe rakhta hun tere kash teri Thokar se

sarfaraaz aaj mera kasa-e-sar ho jaye

tere bimar yahi karte hain har subh du'a

aaj kuchh aur fuzun dard-e-jigar ho jaye

hasrat-e-did ne dam rok liya aankhon mein

tum jo aao to aahang-e-safar ho jae

jis taraf le ke chalen log janaza mera

kash tera bhi usi samt guzar ho jaye

un ki ta'rif mein jo she'r kahun mein 'fazli'

gosh wala ke qarin jae guhar ho jaye