tere jalwe ka hai mere dil-e-sad-chaak se ishq

tere jalve kā hai mere dil-e-sad-chāk se 'ishq

sho.ala-e-tūr kā goyā ḳhas-o-ḳhāshāk se 'ishq

nosh-e-dārū se ġharaz ab hai na tiryāk se 'ishq

said-e-bismil ko hai sayyād kī fitrāk se 'ishq

maiñ tirī yaad kī mahviyat-o-ġhaflat pe nisār

ahl-e-dānish ko mubārak rahe idrāk se 'ishq

ashk-e-ḳhūnīñ bhī 'atā kar jo diye zaḳhm-e-jigar

mujh ko maulā hai usī āb-e-tarab-nāk se 'ishq

chāhtā hai dil-e-be-tāb ko yuuñ nuur tirā

sham' ko jaise ho parvāna-e-be-bāk se 'ishq

kholtā aañkh nahīñ huuñ ki na khul jaa.e kahīñ

terī sūrat kā mire dīda-e-nam-nāk se 'ishq

bulbul-e-zār ko jaise gul tarse 'fazlī'

yuuñ azal se hai mujhe sāhib-e-laulāk se 'ishq

tere jalwe ka hai mere dil-e-sad-chaak se 'ishq

shoala-e-tur ka goya KHas-o-KHashak se 'ishq

nosh-e-daru se gharaz ab hai na tiryak se 'ishq

said-e-bismil ko hai sayyaad ki fitrak se 'ishq

main teri yaad ki mahwiyat-o-ghaflat pe nisar

ahl-e-danish ko mubarak rahe idrak se 'ishq

ashk-e-KHunin bhi 'ata kar jo diye zaKHm-e-jigar

mujh ko maula hai usi aab-e-tarab-nak se 'ishq

chahta hai dil-e-be-tab ko yun nur tera

sham' ko jaise ho parwana-e-be-bak se 'ishq

kholta aankh nahin hun ki na khul jae kahin

teri surat ka mere dida-e-nam-nak se 'ishq

bulbul-e-zar ko jaise gul tarse 'fazli'

yun azal se hai mujhe sahib-e-laulak se 'ishq