تیرے جلوے کا ہے میرے دل صد چاک سے عشق

تیرے جلوے کا ہے میرے دل صد چاک سے عشق

شعلۂ طور کا گویا خس و خاشاک سے عشق

نوش دارو سے غرض اب ہے نہ تریاک سے عشق

صید بسمل کو ہے صیاد کی فتراک سے عشق

میں تری یاد کی محویت و غفلت پہ نثار

اہل دانش کو مبارک رہے ادراک سے عشق

اشک خونیں بھی عطا کر جو دئے زخم جگر

مجھ کو مولا ہے اسی آب طرب ناک سے عشق

چاہتا ہے دل بے تاب کو یوں نور ترا

شمع کو جیسے ہو پروانہ بے باک سے عشق

کھولتا آنکھ نہیں ہوں کہ نہ کھل جائے کہیں

تیری صورت کا مرے دیدۂ نم ناک سے عشق

بلبل زار کو جیسے گل ترسے فضلیؔ

یوں ازل سے ہے مجھے صاحب لولاک سے عشق