qibla-e-dil kaba-e-jaan aur hai

qibla-e-dil ka.aba-e-jāñ aur hai

sajda-gāh-e-ahl-e-irfāñ aur hai

ho ke ḳhush kaTvāte haiñ apne gale

āshiqoñ kī īd-e-qurbāñ aur hai

roz-o-shab yaañ ek sī hai raushnī

dil ke dāġhoñ kā charāġhāñ aur hai

ḳhaar dikhlātī hai phūloñ kī bahār

bulbulo apnā gulistāñ aur hai

qaid meñ ārām āzādī vabāl

ham giraftāroñ kā zindāñ aur hai

bahr-e-ulfat meñ nahīñ kashtī kā kaam

nuuh se kah do ye tūfāñ aur hai

kis kā andesha hai barq-o-sail se

apne ḳhirman kā nigahbāñ aur hai

dard vo dil meñ vo siina par hai daaġh

jis kā marham jis kā darmāñ aur hai

ka.aba rū mehrāb abrū ai 'amīr'

apnī taa.at apnā īmāñ aur hai

qibla-e-dil kaba-e-jaan aur hai

sajda-gah-e-ahl-e-irfan aur hai

ho ke KHush kaTwate hain apne gale

aashiqon ki id-e-qurban aur hai

roz-o-shab yan ek si hai raushni

dil ke daghon ka charaghan aur hai

KHar dikhlati hai phulon ki bahaar

bulbulo apna gulistan aur hai

qaid mein aaram aazadi wabaal

hum giraftaron ka zindan aur hai

bahr-e-ulfat mein nahin kashti ka kaam

nuh se kah do ye tufan aur hai

kis ka andesha hai barq-o-sail se

apne KHirman ka nigahban aur hai

dard wo dil mein wo sina par hai dagh

jis ka marham jis ka darman aur hai

kaba ru mehrab abru ai 'amir'

apnī taat apna iman aur hai