rāz-e-sar-basta mohabbat ke zabāñ tak pahuñche

rāz-e-sar-basta mohabbat ke zabāñ tak pahuñche

baat baḌh kar ye ḳhudā jaane kahāñ tak pahuñche

kyā tasarruf hai tire husn kā allāh allāh

jalve āñkhoñ se utar kar dil-o-jāñ tak pahuñche

tirī manzil pe pahuñchnā koī āsān na thā

sarhad-e-aql se guzre to yahāñ tak pahuñche

hairat-e-ishq mirī husn kā ā.īna hai

dekhne vaale kahāñ se haiñ kahāñ tak pahuñche

khul gayā aaj nigāheñ haiñ nigāheñ apnī

jalve hī jalve nazar aa.e jahāñ tak pahuñche

vahī is gosha-e-dāmāñ kī haqīqat jaane

jo mire dīda-e-ḳhūñ-nāba-fishāñ tak pahuñche

ibtidā meñ jinheñ ham nañg-e-vafā samjhe the

hote hote vo gile husn-e-bayāñ tak pahuñche

aah vo harf-e-tamannā ki na lab tak aa.e

haa.e vo baat ki ik ik kī zabāñ tak pahuñche

kis kā dil hai ki sune qissa-e-furqat merā

kaun hai jo mire andoh-e-nihāñ tak pahuñche

ḳhalish-añgez thā kyā kyā tirī mizhgāñ kā ḳhayāl

TuuT kar dil meñ ye nashtar rag-e-jāñ tak pahuñche

na pata sañg-e-nishāñ kā na ḳhabar rahbar kī

justujū meñ tire dīvāne yahāñ tak pahuñche

na ġhubār-e-rah-e-manzil hai na āvāz-e-jaras

kaun mujh rahrav-e-gum-karda-e-nishāñ tak pahuñche

saaf tauhīn hai ye dard-e-mohabbat kī 'hafīz'

husn kā raaz ho aur merī zabāñ tak pahuñche

rāz-e-sar-basta mohabbat ke zabāñ tak pahuñche

baat baḌh kar ye ḳhudā jaane kahāñ tak pahuñche

kyā tasarruf hai tere husn kā allāh allāh

jalwe āñkhoñ se utar kar dil-o-jāñ tak pahuñche

tirī manzil pe pahuñchnā koī āsān na thā

sarhad-e-aql se guzre to yahāñ tak pahuñche

hairat-e-ishq mirī husn kā āīna hai

dekhne wale kahāñ se haiñ kahāñ tak pahuñche

khul gayā aaj nigāheñ haiñ nigāheñ apnī

jalwe hī jalwe nazar aae jahāñ tak pahuñche

wahī is gosha-e-dāmāñ kī haqīqat jaane

jo mere dīda-e-ḳhūñ-nāba-fishāñ tak pahuñche

ibtidā meñ jinheñ hum nañg-e-wafā samjhe the

hote hote wo gile husn-e-bayāñ tak pahuñche

aah wo harf-e-tamannā ki na lab tak aae

hae wo baat ki ek ek kī zabāñ tak pahuñche

kis kā dil hai ki sune qissa-e-furqat merā

kaun hai jo mere andoh-e-nihāñ tak pahuñche

ḳhalish-añgez thā kyā kyā tirī mizhgāñ kā ḳhayāl

TuT kar dil meñ ye nashtar rag-e-jāñ tak pahuñche

na pata sañg-e-nishāñ kā na ḳhabar rahbar kī

justujū meñ tere dīwāne yahāñ tak pahuñche

na ġhubār-e-rah-e-manzil hai na āwāz-e-jaras

kaun mujh rahraw-e-gum-karda-e-nishāñ tak pahuñche

saf tauhīn hai ye dard-e-mohabbat kī 'hafīz'

husn kā raaz ho aur merī zabāñ tak pahuñche