raat gae yun dil ko jaane sard hawaen aati hain

raat ga.e yuuñ dil ko jaane sard havā.eñ aatī haiñ

ik darvesh kī qabr pe jaise raqqāsā.eñ aatī haiñ

sāda-lauhī kī nibTegī is rañgīn zamāne se

do āñkhoñ kā pīchhā karne laakh adā.eñ aatī haiñ

DhūñDh rahī hai mere tan meñ shāyad merī ruuh mujhe

apne sannāToñ se kuchh mānūs sadā.eñ aatī haiñ

merā ik ik lamha karb liye phirtā hai sadiyoñ kā

ik duniyā ke raste meñ kitnī duniyā.eñ aatī haiñ

pahle sar se ūñchī lahroñ se bhī ham laḌ lete the

ab to in sūkhe hoñToñ par sirf duā.eñ aatī haiñ

dasht-navardī ke daurān 'muzaffar' sar par dhuup rahī

jab se kashtī meñ baiThe haiñ roz ghaTā.eñ aatī haiñ

raat gae yun dil ko jaane sard hawaen aati hain

ek darwesh ki qabr pe jaise raqqasaen aati hain

sada-lauhi ki nibTegi is rangin zamane se

do aankhon ka pichha karne lakh adaen aati hain

DhunDh rahi hai mere tan mein shayad meri ruh mujhe

apne sannaTon se kuchh manus sadaen aati hain

mera ek ek lamha karb liye phirta hai sadiyon ka

ek duniya ke raste mein kitni duniyaen aati hain

pahle sar se unchi lahron se bhi hum laD lete the

ab to in sukhe honTon par sirf duaen aati hain

dasht-nawardi ke dauran 'muzaffar' sar par dhup rahi

jab se kashti mein baiThe hain roz ghaTaen aati hain