nahin gul hai ye paimana kisi ka

nahīñ gul hai ye paimāna kisī kā

chaman hai yā ki mai-ḳhāna kisī kā

kisī kā ka.aba but-ḳhāna kisī kā

mirā ma.abad hai kāshāna kisī kā

kiyā be-jurm us ne ḳhūn-e-āshiq

na samjhā haaye samjhānā kisī kā

dil-e-sad-chāk kaam aa.egā ik din

banā.eñge use shānā kisī kā

mujhe hotā hai apne qatl kā ġham

jo yaad aatā hai pachhtānā kisī kā

hamārī bandagī kahnā butoñ se

agar ho dair meñ jaanā kisī kā

bhalā kyā Thiik hai qīmat kā us kī

do a.alam ho jo bai.āna kisī kā

rahe jaate haiñ dil meñ dil ke armāñ

sitam Dhātā hai sharmānā kisī kā

kahā us but ne sun kar hāl-e-'ālī'

ye afsūñ thā ki afsāna kisī kā

nahin gul hai ye paimana kisi ka

chaman hai ya ki mai-KHana kisi ka

kisi ka kaba but-KHana kisi ka

mera mabad hai kashana kisi ka

kiya be-jurm us ne KHun-e-ashiq

na samjha haye samjhana kisi ka

dil-e-sad-chaak kaam aaega ek din

banaenge use shana kisi ka

mujhe hota hai apne qatl ka gham

jo yaad aata hai pachhtana kisi ka

hamari bandagi kahna buton se

agar ho dair mein jaana kisi ka

bhala kya Thik hai qimat ka us ki

do aalam ho jo baiana kisi ka

rahe jate hain dil mein dil ke arman

sitam Dhata hai sharmana kisi ka

kaha us but ne sun kar haal-e-'ali'

ye afsun tha ki afsana kisi ka