rah-e-ishq se guzarna dil-e-muztarib sambhal kar

rah-e-ishq se guzarnā dil-e-muztarib sambhal kar

yahāñ qāfile luTe haiñ faqat ek gaam chal kar

kahīñ ruḳh badal na le ab mirī aarzū kā dhārā

vo badal rahe haiñ nazreñ mirī zindagī badal kar

mirā hāl-e-dil na pūchho mirā hāl-e-dil hī kyā hai

ki maiñ saañs le rahā huuñ shab-e-ġham sañbhal-sañbhal kar

vahī dil kī ārzūeñ jo ghuTī huī thiiñ dil meñ

shab-e-ġham nikal rahī haiñ mire āñsuoñ meñ Dhal kar

tirī bazm meñ nahīñ hai koī farq dair-o-ka.aba

mirī ruuh bhī na jaa.e tirī bazm se nikal kar

ye kashākash-e-zamāna rahe hashr tak salāmat

na.ī zindagī milī hai mujhe is fazā meñ pal kar

mirī shā.erī ko nisbat hai ḳhudā-o-nā-ḳhudā se

ho 'azīz' nukta-chīnī to ho soch kar sambhal kar

rah-e-ishq se guzarna dil-e-muztarib sambhal kar

yahan qafile luTe hain faqat ek gam chal kar

kahin ruKH badal na le ab meri aarzu ka dhaara

wo badal rahe hain nazren meri zindagi badal kar

mera haal-e-dil na puchho mera haal-e-dil hi kya hai

ki main sans le raha hun shab-e-gham sanbhal-sanbhal kar

wahi dil ki aarzuen jo ghuTi hui thin dil mein

shab-e-gham nikal rahi hain mere aansuon mein Dhal kar

teri bazm mein nahin hai koi farq dair-o-kaba

meri ruh bhi na jae teri bazm se nikal kar

ye kashakash-e-zamana rahe hashr tak salamat

nai zindagi mili hai mujhe is faza mein pal kar

meri shaeri ko nisbat hai KHuda-o-na-KHuda se

ho 'aziz' nukta-chini to ho soch kar sambhal kar