mere dil mein kyun KHayal-e-kucha-e-dil-bar na ho

mere dil meñ kyuuñ ḳhayāl-e-kūcha-e-dil-bar na ho

bulbul-e-āvāra ko yād-e-chaman kyūñ-kar na ho

dil butān-e-dahr kī tauqīr kā ḳhūgar na ho

ḳhāna-e-ka’aba meñ bā-'azmat agar patthar na ho

va.ade par ā.eñge vo ai dil Thahar muztar na ho

barq-tābinda na ban aape se tū bāhar na ho

hijr ke ālām se chhūTūñ ye qismat meñ nahīñ

maut bhī aane kā gar va.ada kare bāvar na ho

TukḌe TukḌe ho gayā hai dil firāq-e-yār meñ

muntashir ai vasl ye ganjīna-e-abtar na ho

shar nikālā hai nirālā kahtā hai qātil mirā

zinda-e-jāved hai vo jism jis par sar na ho

uḌ sakeñ barsāt meñ kis tarah jugnū be-shumār

josh-e-girya meñ sharar-afshāñ jo dil aksar na ho

’āriz-e-tābāñ se hotā hai ise kasb-e-jiyā

shab-charāġh ik din tumhāre kaan kā gauhar na ho

ḳhuun kā pyāsā hai tū aur ḳhuun hī mujh meñ nahīñ

chiir kar dil dekh le qātil agar bāvar na ho

mere dikhlāne ko uTThe ho jo qatl-e-ġhair par

teġh lo vo haath meñ jis meñ zarā jauhar na ho

marte hī dīdār-e-jānāñ ho muyassar bil-yaqīñ

biich meñ haa.il agar ye parda-e-mahshar na ho

qatl hī par mere gar haT hai to āmāda huuñ maiñ

roz kā jhagḌā miTe tan par balā se sar na ho

tairtā hai phuul ban kar bahr-e-ġham meñ dil mirā

kis tarah Duube vo kashtī jis meñ kuchh lañgar na ho

qalb-e-momin ā.īna hai zāt-e-momin kā 'razā'

dekh kar hairāñ use kyuuñ 'aql-e-iskandar na ho

mere dil mein kyun KHayal-e-kucha-e-dil-bar na ho

bulbul-e-awara ko yaad-e-chaman kyun-kar na ho

dil butan-e-dahr ki tauqir ka KHugar na ho

KHana-e-ka’aba mein ba-'azmat agar patthar na ho

wade par aaenge wo ai dil Thahar muztar na ho

barq-tabinda na ban aape se tu bahar na ho

hijr ke aalam se chhuTun ye qismat mein nahin

maut bhi aane ka gar wada kare bawar na ho

TukDe TukDe ho gaya hai dil firaq-e-yar mein

muntashir ai wasl ye ganjina-e-abtar na ho

shar nikala hai nirala kahta hai qatil mera

zinda-e-jawed hai wo jism jis par sar na ho

uD saken barsat mein kis tarah jugnu be-shumar

josh-e-girya mein sharar-afshan jo dil aksar na ho

’ariz-e-taban se hota hai ise kasb-e-jiya

shab-charagh ek din tumhaare kan ka gauhar na ho

KHun ka pyasa hai tu aur KHun hi mujh mein nahin

chir kar dil dekh le qatil agar bawar na ho

mere dikhlane ko uTThe ho jo qatl-e-ghair par

tegh lo wo hath mein jis mein zara jauhar na ho

marte hi didar-e-jaanan ho muyassar bil-yaqin

bich mein hail agar ye parda-e-mahshar na ho

qatl hi par mere gar haT hai to aamada hun main

roz ka jhagDa miTe tan par bala se sar na ho

tairta hai phul ban kar bahr-e-gham mein dil mera

kis tarah Dube wo kashti jis mein kuchh langar na ho

qalb-e-momin aaina hai zat-e-momin ka 'raza'

dekh kar hairan use kyun 'aql-e-iskandar na ho