rind-e-KHarab tera wo mai piye hue hai

rind-e-ḳharāb terā vo mai piye hue hai

muddat se jaan jis par zāhid diye hue hai

kis shaan se vo mai-kash aatā hai mai-kade meñ

qaazī subū surāhī muftī liye hue hai

aatā nahīñ nazar kuchh go sāmnā hai us kā

kyā beach meñ tahayyur parda kiye hue hai

ho kaun baḳhiya-gar se zaḳhmī kā tere saa.ī

rishta khiñchā hai sozan muñh ko siye hue hai

pīr-e-muġhāñ vo kākul murshid hai bāda-ḳhvāro

jamshed bhī pyāla us kā piye hue hai

hurmat meñ duḳht-e-raz kī isrār hai jo itnā

ye baat kyā hai rind-o-vā.iz piye hue hai

rahm ab 'amīr' par bhī lāzim hai yaar tujh ko

kab se Dha.ī vo tere dar par diye hue hai

rind-e-KHarab tera wo mai piye hue hai

muddat se jaan jis par zahid diye hue hai

kis shan se wo mai-kash aata hai mai-kade mein

qazi subu surahi mufti liye hue hai

aata nahin nazar kuchh go samna hai us ka

kya beach mein tahayyur parda kiye hue hai

ho kaun baKHiya-gar se zaKHmi ka tere sai

rishta khincha hai sozan munh ko siye hue hai

pir-e-mughan wo kakul murshid hai baada-KHwaro

jamshed bhi pyala us ka piye hue hai

hurmat mein duKHt-e-raz ki israr hai jo itna

ye baat kya hai rind-o-waiz piye hue hai

rahm ab 'amir' par bhi lazim hai yar tujh ko

kab se Dhai wo tere dar par diye hue hai