rindon ke liye mai-KHane ki har rasm ibaadat hoti hai

rindoñ ke liye mai-ḳhāne kī har rasm 'ibādat hotī hai

dilbar ko biThā kar pesh-e-nazar chehre kī tilāvat hotī hai

vo 'ilm-e-sharī'at hai vā'iz jis ne bhī paḌhā use sanad milī

jo maktab-e-’ishq meñ aa jaa.e mushkil meñ ijāzat hotī hai

ik rind ne mujh ko batlāyā na jannat hai na bāġh-e-iram

jis ḳhaak pe do dil pyaar kareñ vo ḳhaak hī jannat hotī hai

be-kār shikāyat kyā ma.anī ik baat pate kī kahtā huuñ

āñkhoñ ko 'abas badnām kiyā sab dil kī sharārat hotī hai

hai tujh pe karam ik sūrat kā tujhe 'qādrī' kuchh pahchān nahīñ

tū uskī haqīqat kyā jaane kyā chiiz mohabbat hotī hai

rindon ke liye mai-KHane ki har rasm 'ibaadat hoti hai

dilbar ko biTha kar pesh-e-nazar chehre ki tilawat hoti hai

wo 'ilm-e-shari'at hai wa'iz jis ne bhi paDha use sanad mili

jo maktab-e-’ishq mein aa jae mushkil mein ijazat hoti hai

ek rind ne mujh ko batlaya na jannat hai na bagh-e-iram

jis KHak pe do dil pyar karen wo KHak hi jannat hoti hai

be-kar shikayat kya mani ek baat pate ki kahta hun

aankhon ko 'abas badnam kiya sab dil ki shararat hoti hai

hai tujh pe karam ek surat ka tujhe 'qadri' kuchh pahchan nahin

tu uski haqiqat kya jaane kya chiz mohabbat hoti hai