tumhaari galiyon ki gard-o-ghubar ho jaun

tumhārī galiyoñ kī gard-o-ġhubār ho jā.ūñ

miTūñ tumhīñ pe tumhīñ par nisār ho jā.ūñ

tumhār 'ishq meñ suulī pe chaḌh gayā koī

koī to chāhe ke maiñ sañgsār ho jā.ūñ

tumheñ pasand agar chāk-dāmanī hai mirī

ishāra kar do abhī tār-tār ho jā.ūñ

mirī ġharībī hī un ko pasand hai varna

abhī vo kah deñ abhī tāj-dār ho jā.ūñ

tumhār saath hī karnī hai tai har ik manzil

akele kaise batāo maiñ paar ho jā.ūñ

nazar bichhā.e maiñ baiThā huuñ raah meñ kab se

bahār aa.e to nazr-e-bahār ho jā.ūñ

kisī ke qadmoñ meñ guzre ye zindagī 'ālam

maiñ chāhtā hī nahīñ nām-dār ho jā.ūñ

tumhaari galiyon ki gard-o-ghubar ho jaun

miTun tumhin pe tumhin par nisar ho jaun

tumhaar 'ishq mein suli pe chaDh gaya koi

koi to chahe ke main sangsar ho jaun

tumhein pasand agar chaak-damani hai meri

ishaara kar do abhi tar-tar ho jaun

meri gharibi hi un ko pasand hai warna

abhi wo kah den abhi taj-dar ho jaun

tumhaar sath hi karni hai tai har ek manzil

akele kaise batao main par ho jaun

nazar bichhae main baiTha hun rah mein kab se

bahaar aae to nazr-e-bahaar ho jaun

kisi ke qadmon mein guzre ye zindagi 'alam

main chahta hi nahin nam-dar ho jaun