na kaam aae jo daman ke ashk-e-KHun kya hai

na kaam aa.e jo dāman ke ashk-e-ḳhūñ kyā hai

jo kaam aa.e na āñkhoñ ke vo lahū kyā hai

banā hai va.ada-e-fardā se un ke tār-e-kafan

safed riish kā merī har ek mū kyā hai

na rañg laa.e na bū de agar kareñ pāmāl

maiñ kuchh nahīñ huuñ merā ḳhūn-e-ārzū kyā hai

jo toḌ hai evaz-e-mai zarā sā paanī de

hamāre dil kā phapholā hai ye subū kyā hai

bujhegī pyaas na merī agar galā ragḌūñ

na aab jis meñ ho vo ḳhanjar-e-adū kyā hai

jo nā-shanās haiñ un ko 'riyāz' ho ma.alūm

ġhulām-e-sāqī-e-kausar kī aabrū kyā hai

na kaam aae jo daman ke ashk-e-KHun kya hai

jo kaam aae na aankhon ke wo lahu kya hai

bana hai wada-e-farda se un ke tar-e-kafan

safed rish ka meri har ek mu kya hai

na rang lae na bu de agar karen pamal

main kuchh nahin hun mera KHun-e-arzu kya hai

jo toD hai ewaz-e-mai zara sa pani de

hamare dil ka phaphola hai ye subu kya hai

bujhegi pyas na meri agar gala ragDun

na aab jis mein ho wo KHanjar-e-adu kya hai

jo na-shanas hain un ko 'riyaz' ho malum

ghulam-e-saqi-e-kausar ki aabru kya hai