rang par kal tha abhi lala-gulshan kaisa

rañg par kal thā abhī lāla-gulshan kaisā

be-charāġh aaj hai har ek nasheman kaisā

ab ḳhudā jaane bahār aatī hai us meñ ki nahīñ

mere dam se kabhī ābād thā gulshan kaisā

zab.h ke vaqt bahut saaf rahā thā ye to

de uThā ḳhuun dam-e-hashr ye dāman kaisā

to dharī jā.egī us ghar se jo niklī koī baat

nigah-e-shauq ye dīvār meñ rauzan kaisā

merī saj-dhaj to koī isha-e-butāñ meñ dekhe

saath qashqe ke hai zunnār-e-barahman kaisā

aa.e haiñ daaġh nayā dene vo mujh ko pas-e-marg

aaj phailā hai ujālā sar-e-madfan kaisā

bāġhbāñ kaam hameñ kyā hai vo ujḌe ki rahe

jab hamīñ baaġh se nikle to nasheman kaisā

pārsā ban ke 'riyāz' aa.e haiñ maiḳhāne meñ

aap baiThe haiñ chhupā.e hue dāman kaisā

rang par kal tha abhi lala-gulshan kaisa

be-charagh aaj hai har ek nasheman kaisa

ab KHuda jaane bahaar aati hai us mein ki nahin

mere dam se kabhi aabaad tha gulshan kaisa

zabh ke waqt bahut saf raha tha ye to

de uTha KHun dam-e-hashr ye daman kaisa

to dhari jaegi us ghar se jo nikli koi baat

nigah-e-shauq ye diwar mein rauzan kaisa

meri saj-dhaj to koi isha-e-butan mein dekhe

sath qashqe ke hai zunnar-e-barahman kaisa

aae hain dagh naya dene wo mujh ko pas-e-marg

aaj phaila hai ujala sar-e-madfan kaisa

baghban kaam hamein kya hai wo ujDe ki rahe

jab hamin bagh se nikle to nasheman kaisa

parsa ban ke 'riyaz' aae hain maiKHane mein

aap baiThe hain chhupae hue daman kaisa