chheDte hi sar mere zulf-e-rasa ho jaegi

chheḌte hī sar mire zulf-e-rasā ho jā.egī

ye parī tere liye o dil balā ho jā.egī

ai asīrān-e-qafas aane ko hai fasl-e-ḳhizāñ

chār-din meñ aur gulshan kī havā ho jā.egī

saath ashkoñ ke lahū kyā laḳht-e-dil aane lage

kuchh na kuchh badnām ab merī vafā ho jā.egī

mauj-e-tūfāñ pheñk degī us ko sāhil kī taraf

paar ab kashtī mirī ai nāḳhudā ho jā.egī

le nahīñ saktā huuñ maiñ bhūle se bhī ka.aba kā naam

kyā ḳhudā.ī butoñ kī ai ḳhudā ho jā.egī

lā bhī de sode kī botal jā ke ai shaiḳh-e-haram

āb-e-zamzam kyā milā.ūñ bad-maza ho jā.egī

luuT lo achchhī tarah lutf-e-ma.āsī ai 'riyāz'

haiñ yahī āsār ab duniyā fanā ho jā.egī

chheDte hi sar mere zulf-e-rasa ho jaegi

ye pari tere liye o dil bala ho jaegi

ai asiran-e-qafas aane ko hai fasl-e-KHizan

chaar-din mein aur gulshan ki hawa ho jaegi

sath ashkon ke lahu kya laKHt-e-dil aane lage

kuchh na kuchh badnam ab meri wafa ho jaegi

mauj-e-tufan phenk degi us ko sahil ki taraf

par ab kashti meri ai naKHuda ho jaegi

le nahin sakta hun main bhule se bhi kaba ka nam

kya KHudai buton ki ai KHuda ho jaegi

la bhi de sode ki botal ja ke ai shaiKH-e-haram

aab-e-zamzam kya milaun bad-maza ho jaegi

luT lo achchhi tarah lutf-e-maasi ai 'riyaz'

hain yahi aasar ab duniya fana ho jaegi