wo kaun suna mujhe un ka mera dua dena

vo kaun sunā mujhe un kā mirā duā denā

baḌhe na baat ye hai aag ko havā denā

kahāñ uḌegī na zāhid ko kuchh patā denā

din meñ aa.e to rindo havā batā denā

tumhāre kūcha meñ kuchh taur vaale baiTheñ haiñ

zarā tum aa ke lab-e-bām muskurā denā

balā hai qabr kī shab is se baḌh ke hashr ke din

na aa.uuñ hosh meñ itnī mujhe pilā denā

rahegā yaad mujhe bhī unheñ bhī vasl kī shab

vo un ke haar kī kaliyoñ kā muskurā denā

mazā ho tañg dar-e-ḳhānqa meñ shaiḳh phañse

baḌā sā ḳham koī rindo gale lagā denā

na lāla-zār banānā mazār ko na sahī

charāġh ke aage kabhī shaam ko jalā denā

hazār baar maiñ us iltifāt ke sadqe

hamesha daaġh mire dil ko ik nayā denā

kareñ vo aur bhī pāmāl ḳhūñ-shuda dil ko

lagī meñ jā ke hinā aur tū lagā denā

hazāroñ aib chhupātī hai mirī rīsh-e-darāz

churā.e koī ḳhum-e-mai mujhe batā denā

mire sivā nazar aa.e na koī dozaḳh meñ

kisī kā jurm ho mālik mujhe sazā denā

chamak rahī haiñ nigāhoñ meñ bijliyāñ paiham

harīm-e-nāz se parda zarā uThā denā

jahāñ-tahāñ bahut aane lagā hai muñh vaa.iz

zarā use kahīñ rindo mazā chakhā denā

sunā hai ham ne bahut kuchh kalīm ke muñh se

ham aa.eñ to hameñ āvāz hī sunā denā

zabāñ ho band mirī to bhī kar luuñ maiñ tauba

dam-e-aḳhīr mujhe bāda-e-jāñ-fazā denā

haram hai jā-e-adab kaam degī jannat meñ

farishto taaq se botal zarā uThā denā

garāñ hai tauba ko miinā kā shor-e-qulqul bhī

ye gul machā.e to us kā galā dabā denā

sharāb-e-nāb-e-suḳhan kā ye daur-e-āḳhir hai

ġhazal 'riyāz' kī yāroñ ko tum sunā denā

wo kaun suna mujhe un ka mera dua dena

baDhe na baat ye hai aag ko hawa dena

kahan uDegi na zahid ko kuchh pata dena

din mein aae to rindo hawa bata dena

tumhaare kucha mein kuchh taur wale baiThen hain

zara tum aa ke lab-e-baam muskura dena

bala hai qabr ki shab is se baDh ke hashr ke din

na aaun hosh mein itni mujhe pila dena

rahega yaad mujhe bhi unhen bhi wasl ki shab

wo un ke haar ki kaliyon ka muskura dena

maza ho tang dar-e-KHanqa mein shaiKH phanse

baDa sa KHam koi rindo gale laga dena

na lala-zar banana mazar ko na sahi

charagh ke aage kabhi sham ko jala dena

hazar bar main us iltifat ke sadqe

hamesha dagh mere dil ko ek naya dena

karen wo aur bhi pamal KHun-shuda dil ko

lagi mein ja ke hina aur tu laga dena

hazaron aib chhupati hai meri rish-e-daraaz

churae koi KHum-e-mai mujhe bata dena

mere siwa nazar aae na koi dozaKH mein

kisi ka jurm ho malik mujhe saza dena

chamak rahi hain nigahon mein bijliyan paiham

harim-e-naz se parda zara uTha dena

jahan-tahan bahut aane laga hai munh waiz

zara use kahin rindo maza chakha dena

suna hai hum ne bahut kuchh kalim ke munh se

hum aaen to hamein aawaz hi suna dena

zaban ho band meri to bhi kar lun main tauba

dam-e-aKHir mujhe baada-e-jaan-faza dena

haram hai ja-e-adab kaam degi jannat mein

farishto taq se botal zara uTha dena

garan hai tauba ko mina ka shor-e-qulqul bhi

ye gul machae to us ka gala daba dena

sharab-e-nab-e-suKHan ka ye daur-e-aKHir hai

ghazal 'riyaz' ki yaron ko tum suna dena