anjuman mein shor tha mina uThe saghar uThe

anjuman meñ shor thā miinā uThe sāġhar uThe

itnī saaqī ne pilā.ī riñd tauba kar uThe

bazm-e-mahshar se ġhulām-e-sāqī-e-kausar uThe

aao ai yārān-e-mai-e-ḳhāna zarā sāġhar uThe

rauzan-e-dar khole jaa.eñ yā hijāb-e-dar uThe

ham ġharīboñ ke dar-e-daulat se ab bistar uThe

kuchh hamāre kaan phūñke is tarah nāqūs ne

but-kade se jab uThe to ban kar ham patthar uThe

kyā hamārī jaan lene ko koī baat uTh rahī

vo uThe dushman uThā chhuriyāñ ḳhanjar uThe

jaate jaate arsa-gāh-e-hashr tak jo haal ho

uThte uThte qabr meñ sau fitna-e-mahshar uThe

sū-e-sahrā jā۔ūñ maiñ āñkhoñ se lekin kyā karūñ

ai junūñ ghar se nikal kar paañv jab bāhar uThe

ham samajhte the nikāleñge hamāre dil kī phāñs

vo uThe bhī to chubhone ke liye nashtar uThe

itnī kasrat se are saaqī phir itnī tund tez

achchhe achchhe piine vaale aaj tauba kar uThe

kyā karūñ kāñdhā nahīñ dete farishte saath ke

dosh par bār-e-garāñ a.amāl kā kyūñkar uThe

phuul barse jis taraf vaa.iz huā terā guzar

ham se dīvāne jidhar guzre udhar patthar uThe

mai-kade se shaiḳh-e-fānī kah ke ye ruḳhsat hue

dekhiye ab lutf-e-sohbat kab lab-e-kausar uThe

be-piye bhī sub.h-e-mahshar ham ko laġhzish hai bahut

qabr se kyuuñ kar uTheñ bār-e-gunāh kyuuñ kar uThe

jubba-sā.ī jis se kī qismat chamak uThī 'riyāz'

hazrat-e-'sāhir' ke dar se kyuuñ hamārā sar uThe

anjuman mein shor tha mina uThe saghar uThe

itni saqi ne pilai rind tauba kar uThe

bazm-e-mahshar se ghulam-e-saqi-e-kausar uThe

aao ai yaran-e-mai-e-KHana zara saghar uThe

rauzan-e-dar khole jaen ya hijab-e-dar uThe

hum gharibon ke dar-e-daulat se ab bistar uThe

kuchh hamare kan phunke is tarah naqus ne

but-kade se jab uThe to ban kar hum patthar uThe

kya hamari jaan lene ko koi baat uTh rahi

wo uThe dushman uTha chhuriyan KHanjar uThe

jate jate arsa-gah-e-hashr tak jo haal ho

uThte uThte qabr mein sau fitna-e-mahshar uThe

su-e-sahra ja۔un main aankhon se lekin kya karun

ai junun ghar se nikal kar panw jab bahar uThe

hum samajhte the nikalenge hamare dil ki phans

wo uThe bhi to chubhone ke liye nashtar uThe

itni kasrat se are saqi phir itni tund tez

achchhe achchhe pine wale aaj tauba kar uThe

kya karun kandha nahin dete farishte sath ke

dosh par bar-e-garan aamal ka kyunkar uThe

phul barse jis taraf waiz hua tera guzar

hum se diwane jidhar guzre udhar patthar uThe

mai-kade se shaiKH-e-fani kah ke ye ruKHsat hue

dekhiye ab lutf-e-sohbat kab lab-e-kausar uThe

be-piye bhi subh-e-mahshar hum ko laghzish hai bahut

qabr se kyun kar uThen bar-e-gunah kyun kar uThe

jubba-sai jis se ki qismat chamak uThi 'riyaz'

hazrat-e-'sahir' ke dar se kyun hamara sar uThe