duri-e-rah se kuchh baiTh gaya dil mera

dūrī-e-rāh se kuchh baiTh gayā dil merā

paañv kyā ḳhaak uThe ab sū-e-manzil merā

rañg bāñdhā hai chaman meñ ye fuġhāñ ne merī

chupke muñh dekhte rahte haiñ anādil merā

āstīñ rañg badle aa.ī lahū de niklī

na chhupā laakh chhupā hashr meñ qātil merā

bazm-e-qavvālī meñ kyā ḳhum se uḌā lī maiñ ne

haath thāmā na kisī ne sar-e-mahfil merā

kuchh ajab lutf se mil-jul ke rahā ek se ek

ġham terā jaañ merī rañj terā dil merā

ye merā ho ke rahā ba.ad-e-fanā turbat meñ

jaañ se bhī hai sivā mere liye dil merā

jo khilā phuul banā zaḳhm mere dil 'riyāz'

jo kalī rah ga.ī khilne se banā dil merā

duri-e-rah se kuchh baiTh gaya dil mera

panw kya KHak uThe ab su-e-manzil mera

rang bandha hai chaman mein ye fughan ne meri

chupke munh dekhte rahte hain anadil mera

aastin rang badle aai lahu de nikli

na chhupa lakh chhupa hashr mein qatil mera

bazm-e-qawwali mein kya KHum se uDa li main ne

hath thama na kisi ne sar-e-mahfil mera

kuchh ajab lutf se mil-jul ke raha ek se ek

gham tera jaan meri ranj tera dil mera

ye mera ho ke raha baad-e-fana turbat mein

jaan se bhi hai siwa mere liye dil mera

jo khila phul bana zaKHm mere dil 'riyaz'

jo kali rah gai khilne se bana dil mera