sharar-e-tur hai jo mauj hai paimane mein

sharar-e-tūr hai jo mauj hai paimāne meñ

bijliyāñ kauñdhtī haiñ aaj to mai-ḳhāne meñ

ek ḳhoshe ke barābar nahīñ maiḳhāne meñ

ḳhum meñ jo hai vo hai añgūr ke har daane meñ

chheḌiye yuuñ dil-e-vābasta shagufta ho jaa.e

lutf khilne meñ hai yā phuul ke murjhā ne meñ

aur bhī chāñd kī shakleñ haiñ nahīñ aap na hoñ

nuur kī sham.eñ nahīñ raushan mire kāshāne meñ

de de tū merī javānī tere sadqe saaqī

hai vo tere chhalakte hue paimāne meñ

lutf hai dair-o-haram donoñ se mujh ko ai shaiḳh

dil hai ka.aba meñ mirā jaañ but-ḳhāne meñ

nahīñ paḌte haiñ zamīñ par jo tire naqsh-e-qadam

kyuuñ uḌe rañg-e-hinā ġhair ke ghar jaane meñ

rizq miltā hai dar-e-hazrat-e-'sāhir' se 'riyāz'

jaam chhalkāte haiñ baiThe hue mai-ḳhāne meñ

sharar-e-tur hai jo mauj hai paimane mein

bijliyan kaundhti hain aaj to mai-KHane mein

ek KHoshe ke barabar nahin maiKHane mein

KHum mein jo hai wo hai angur ke har dane mein

chheDiye yun dil-e-wabasta shagufta ho jae

lutf khilne mein hai ya phul ke murjha ne mein

aur bhi chand ki shaklen hain nahin aap na hon

nur ki shamen nahin raushan mere kashane mein

de de tu meri jawani tere sadqe saqi

hai wo tere chhalakte hue paimane mein

lutf hai dair-o-haram donon se mujh ko ai shaiKH

dil hai kaba mein mera jaan but-KHane mein

nahin paDte hain zamin par jo tere naqsh-e-qadam

kyun uDe rang-e-hina ghair ke ghar jaane mein

rizq milta hai dar-e-hazrat-e-'sahir' se 'riyaz'

jam chhalkate hain baiThe hue mai-KHane mein