ho gae ruKHsat imam-e-sarmad-e-mastana ab

ho ga.e ruḳhsat imām-e-sarmad-e-mastāna ab

muqtadī laa.eñ kahāñ se daulat-e-vajdāna ab

ho ga.ī hāsil use bhī vus'at-e-rindāna ab

hosh meñ aane lagā hai aap kā dīvāna ab

jis ko hāsil ho gayā hai ḳhvāb meñ dīdār-e-yār

us pe lāzim ho gayā hai sajda-e-shukrāna ab

qum-be-iznillāh kī tashrīh mahñgī paḌ ga.ī

khaal khiñchvānī paḌegī bā’as-e-jurmāna ab

boriye par aap ne jab se biThāyā hai mujhe

raas aatī hī nahīñ hai zindagī shāhāna ab

ho rahe haiñ munkashif har shakl meñ jab aap hī

phir nazar aa.e koī kaise mujhe begāna ab

paḌh rahā huuñ ai 'hakīmī' jhuum kar nād-e-'alī

nuur se chamkegā mere dil kā ye kāshāna ab

ho gae ruKHsat imam-e-sarmad-e-mastana ab

muqtadi laen kahan se daulat-e-wajdana ab

ho gai hasil use bhi wus'at-e-rindana ab

hosh mein aane laga hai aap ka diwana ab

jis ko hasil ho gaya hai KHwab mein didar-e-yar

us pe lazim ho gaya hai sajda-e-shukrana ab

qum-be-iznillah ki tashrih mahngi paD gai

khaal khinchwani paDegi ba’as-e-jurmana ab

boriye par aap ne jab se biThaya hai mujhe

ras aati hi nahin hai zindagi shahana ab

ho rahe hain munkashif har shakl mein jab aap hi

phir nazar aae koi kaise mujhe begana ab

paDh raha hun ai 'hakimi' jhum kar nad-e-'ali

nur se chamkega mere dil ka ye kashana ab