ہو گئے رخصت امامِ سرمدِ مستانہ اب

ہو گئے رخصت امامِ سرمدِ مستانہ اب

مقتدی لائیں کہاں سے دولتِ وجدانہ اب

ہو گئی حاصل اسے بھی وسعتِ رندانہ اب

ہوش میں آنے لگا ہے آپ کا دیوانہ اب

جس کو حاصل ہو گیا ہے خواب میں دیدارِ یار

اس پہ لازم ہو گیا ہے سجدۂ شکرانہ اب

قُم باذنِ اللہ کی تشریح مہنگی پڑ گئی

کھال کھینچوانی پڑے گی باعثِ جرمانہ اب

بوریے پر آپ نے جب سے بٹھایا ہے مجھے

راس آتی ہی نہیں ہے زندگی شاہانہ اب

ہو رہے ہیں منکشف ہر شکل میں جب آپ ہی

پھر نظر آئے کوئی کیسے مجھے بیگانہ اب

پڑھ رہا ہو ں اے حکیمیؔ جھوم کر نادِ علی

نور سے چمکے گا میرے دل کا یہ کاشانہ اب