kaise ho jaun bhala nind se bedar abhi

kaise ho jā.ūñ bhalā niiñd se bedār abhī

zīnat-e-ḳhvāb haiñ vo phuul se ruḳhsār abhī

kah rahe the ki milā duuñ kyā ḳhudā se tujh ko

kah diyā maiñ usī pal mire sarkār abhī

hākim-e-husn guzarte haiñ nazar nīchī rakho

varna kar leñge mohabbat meñ giraftār abhī

itnī āsānī se mansūr na ban pāoge

jazba-e-’ishq ko ik aañch hai darkār abhī

pul-sirāt aatā hai aa jaa.e tufail-e-murshid

ham bhī ho jā.eñge is paar se us paar abhī

ik mujāhid hai abhī farsh pe mahv-e-sajda

kis tarah 'arsh se ho hashr kī bauchhār abhī

ho ga.iiñ sadiyāñ zamīñ oḌh ke so.e mujh ko

phir bhī zinda hai ‘hakīmī’ mirā kirdār abhī

kaise ho jaun bhala nind se bedar abhi

zinat-e-KHwab hain wo phul se ruKHsar abhi

kah rahe the ki mila dun kya KHuda se tujh ko

kah diya main usi pal mere sarkar abhi

hakim-e-husn guzarte hain nazar nichi rakho

warna kar lenge mohabbat mein giraftar abhi

itni aasani se mansur na ban paoge

jazba-e-’ishq ko ek aanch hai darkar abhi

pul-siraat aata hai aa jae tufail-e-murshid

hum bhi ho jaenge is par se us par abhi

ek mujahid hai abhi farsh pe mahw-e-sajda

kis tarah 'arsh se ho hashr ki bauchhaar abhi

ho gain sadiyan zamin oDh ke soe mujh ko

phir bhi zinda hai ‘hakimi’ mera kirdar abhi