کیسے ہو جاؤں بھلا نیند سے بیدار ابھی

کیسے ہو جاؤں بھلا نیند سے بیدار ابھی

زینت خواب ہیں وہ پھول سے رخسار ابھی

کہہ رہے تھے کہ ملا دوں کیا خدا سے تجھ کو

کہہ دیا میں اسی پل مرے سرکار ابھی

حاکم حسن گزرتے ہیں نظر نیچی رکھو

ورنہ کر لیں گے محبت میں گرفتار ابھی

اتنی آسانی سے منصور نہ بن پاؤ گے

جذبۂ عشق کو اک آنچ ہے درکار ابھی

پل صراط آتا ہے آ جائے طفیل مرشد

ہم بھی ہو جائیں گے اس پار سے اس پار ابھی

اک مجاہد ہے ابھی فرش پہ محو سجدہ

کس طرح عرش سے ہو حشر کی بوچھار ابھی

ہو گئیں صدیاں زمیں اوڑھ کے سوئے مجھ کو

پھر بھی زندہ ہے حکیمیؔ مرا کردار ابھی