zindagi aur maut mein hai jang rozana alag

zindagī aur maut meñ hai jañg rozāna alag

justujū jiine kī karnā aur mar jaanā alag

bolne kā kyā hai yuuñ to bol dete haiñ sabhī

bolne ke baa'd lekin kar ke dikhlānā alag

'ishq kī manzil pe detā huuñ shahādat har ghaḌī

har nafas hotā hai merā sar alag shāna alag

tum ne un ke dekhne kā dekhnā dekhā nahīñ

un kī chashm-e-mast meñ bastā hai mai-ḳhāna alag

kab talak ā.īna chehre se rahegā dūr-dūr

kab talak rah pā.egā chehre se ā.īna alag

kaun kis ko māntā hai is mashīnī daur meñ

apnā manvānā alag hai rab kā manvānā alag

gard chehre kī haTā.ūñ to 'hakīmī' kis tarah

ho gayā mujh se mirā aaj ā.īna-ḳhāna alag

zindagi aur maut mein hai jang rozana alag

justuju jine ki karna aur mar jaana alag

bolne ka kya hai yun to bol dete hain sabhi

bolne ke ba'd lekin kar ke dikhlana alag

'ishq ki manzil pe deta hun shahadat har ghaDi

har nafas hota hai mera sar alag shana alag

tum ne un ke dekhne ka dekhna dekha nahin

un ki chashm-e-mast mein basta hai mai-KHana alag

kab talak aaina chehre se rahega dur-dur

kab talak rah paega chehre se aaina alag

kaun kis ko manta hai is mashini daur mein

apna manwana alag hai rab ka manwana alag

gard chehre ki haTaun to 'hakimi' kis tarah

ho gaya mujh se mera aaj aaina-KHana alag