roz tajdid-e-iltifat kahan

roz tajdīd-e-iltifāt kahāñ

agle mausam kī sī vo baat kahāñ

haiñ vahī din magar kahāñ vo din

hai vahī raat par vo raat kahāñ

sun tū ai āftāb-e-ālam-e-tāb

tuune dekhī hai merī raat kahāñ

ik zarā mil ke ro leñ aur ki phir

ham kahāñ tum kahāñ ye raat kahāñ

kaT gayā din talāsh-e-manzil meñ

ab guzartī hai dekheñ raat kahāñ

tū ḳhudā hī sahī magar ba-ḳhudā

tujh meñ insān kī sī baat kahāñ

go vahī naġhma hai vahī mutrib

dil pe agle sī vārdāt kahāñ

dil kī baazī lagī hai ab bhī magar

ek hī chaal meñ vo maat kahāñ

hai tumhīñ se ye kā.enāt magar

tum kahāñ merī kā.enāt kahāñ

maktab-e-āshiqī meñ ai 'maikash'

falsafa aur dīniyāt kahāñ

roz tajdid-e-iltifat kahan

agle mausam ki si wo baat kahan

hain wahi din magar kahan wo din

hai wahi raat par wo raat kahan

sun tu ai aaftab-e-alam-e-tab

tune dekhi hai meri raat kahan

ek zara mil ke ro len aur ki phir

hum kahan tum kahan ye raat kahan

kaT gaya din talash-e-manzil mein

ab guzarti hai dekhen raat kahan

tu KHuda hi sahi magar ba-KHuda

tujh mein insan ki si baat kahan

go wahi naghma hai wahi mutrib

dil pe agle si wardat kahan

dil ki bazi lagi hai ab bhi magar

ek hi chaal mein wo mat kahan

hai tumhin se ye kaenat magar

tum kahan meri kaenat kahan

maktab-e-ashiqi mein ai 'maikash'

falsafa aur diniyat kahan