روز تجدید التفات کہاں

روز تجدید التفات کہاں

اگلے موسم کی سی وہ بات کہاں

ہیں وہی دن مگر کہاں وہ دن

ہے وہی رات پر وہ رات کہاں

سن تو اے آفتاب عالم تاب

تونے دیکھی ہے میری رات کہاں

اک ذرا مل کے رو لیں اور کہ پھر

ہم کہاں تم کہاں یہ رات کہاں

کٹ گیا دن تلاش منزل میں

اب گزرتی ہے دیکھیں رات کہاں

تو خدا ہی سہی مگر بخدا

تجھ میں انسان کی سی بات کہاں

گو وہی نغمہ ہے وہی مطرب

دل پہ اگلے سی واردات کہاں

دل کی بازی لگی ہے اب بھی مگر

ایک ہی چال میں وہ مات کہاں

ہے تمہیں سے یہ کائنات مگر

تم کہاں میری کائنات کہاں

مکتب عاشقی میں اے میکشؔ

فلسفہ اور دینیات کہاں