sahab-e-tauhid ko talwar ki hajat nahin

sāhab-e-tauhīd ko talvār kī hājat nahīñ

zaḳhmī-e-mizhgāñ ko kuchh sofār kī hājat nahīñ

kushta-e-ma.ashūq ko guftār kī hājat nahīñ

āshiq-e-gulfām ko gulzār kī hājat nahīñ

jab duī dil se ga.ī aur dilrubā dekhā ayaañ

Daal kar gul ko gale meñ ḳhaar kī hājat nahīñ

āshiq-e-haq haq hue haiñ chhoḌ kar ḳhudī-o-gumāñ

ishq ke māroñ ko kuchh pindār kī hājat nahīñ

maz.haboñ kā shor-o-shar hai manzil-e-avval talak

ma.arifat meñ jā ke phir atvār kī hājat nahīñ

kah anal-haq dam-ba-dam ai mard-e-haq mansūr-vash

jab judā tan se huā phir daar kī hājat nahīñ

dil ko dilbar se lagā kar band-e-chashm-o-gosh-o-lab

sirr-e-jānāñ dekh kar takrār kī hājat nahīñ

kah diyā fir.aun ne bhī maiñ ḳhudā kar ke ḳhudī

ho ke be-ḳhud jab kahe inkār kī hājat nahīñ

jab ḳhudā vāhid kahoge aur kuchh is jā nahīñ

hai ḳhalā jyuuñ ek kuchh dīvār kī hājat nahīñ

āshnā-e-haq jahāñ meñ haiñ hamesha be-niyāz

sāhab-e-iksīr ko zardār kī hājat nahīñ

āshiqoñ kā dil jale aur dilrubā dil-shād haiñ

kaun be-dil hai jise dildār kī hājat nahīñ

qaid ho zulf-e-sanam se ho ga.e sab se rihā

āshiqoñ ko sub.ha-o-zunnār kī hājat nahīñ

jab talak miltā nahīñ vo ahl-e-sūrat hai alam

yaar ko mil sūrat-e-dīvār kī hājat nahīñ

masjid-o-dair-o-haram girjā kunisht aur kyā bahisht

le gale meñ gul-badan gulzār kī hājat nahīñ

jo davā khātā nahīñ kahnā na maane baid kā

ahl-e-hikmat ko bhī us bīmār kī hājat nahīñ

'ārif'-e-allāh jahāñ haiñ bas vahāñ hai shād-o-ḳhush

dost jañgal meñ mile bāzār kī hājat nahīñ

sahab-e-tauhid ko talwar ki hajat nahin

zaKHmi-e-mizhgan ko kuchh sofar ki hajat nahin

kushta-e-mashuq ko guftar ki hajat nahin

aashiq-e-gulfam ko gulzar ki hajat nahin

jab dui dil se gai aur dilruba dekha ayan

Dal kar gul ko gale mein KHar ki hajat nahin

aashiq-e-haq haq hue hain chhoD kar KHudi-o-guman

ishq ke maron ko kuchh pindar ki hajat nahin

mazhabon ka shor-o-shar hai manzil-e-awwal talak

marifat mein ja ke phir atwar ki hajat nahin

kah anal-haq dam-ba-dam ai mard-e-haq mansur-wash

jab juda tan se hua phir dar ki hajat nahin

dil ko dilbar se laga kar band-e-chashm-o-gosh-o-lab

sirr-e-jaanan dekh kar takrar ki hajat nahin

kah diya firaun ne bhi main KHuda kar ke KHudi

ho ke be-KHud jab kahe inkar ki hajat nahin

jab KHuda wahid kahoge aur kuchh is ja nahin

hai KHala jyun ek kuchh diwar ki hajat nahin

aashna-e-haq jahan mein hain hamesha be-niyaz

sahab-e-iksir ko zardar ki hajat nahin

aashiqon ka dil jale aur dilruba dil-shad hain

kaun be-dil hai jise dildar ki hajat nahin

qaid ho zulf-e-sanam se ho gae sab se riha

aashiqon ko subha-o-zunnar ki hajat nahin

jab talak milta nahin wo ahl-e-surat hai alam

yar ko mil surat-e-diwar ki hajat nahin

masjid-o-dair-o-haram girja kunisht aur kya bahisht

le gale mein gul-badan gulzar ki hajat nahin

jo dawa khata nahin kahna na mane baid ka

ahl-e-hikmat ko bhi us bimar ki hajat nahin

'arif'-e-allah jahan hain bas wahan hai shad-o-KHush

dost jangal mein mile bazar ki hajat nahin