saqi hua begana begane se kya kahiye

saaqī huā begāna begāne se kyā kahiye

be-kaifī-e-mai-ḳhāna maiḳhāne se kyā kahiye

kyā us ko nahīñ ma.alūm āshuftagiyāñ merī

nairañgī-e-vīrāna vīrāne se kyā kahiye

takbī-e-vafā sun kar ḳhāmosh haiñ but lekin

pur-shor hai but-ḳhāna but-ḳhāne se kyā kahiye

ham talḳhī-e-qismat se haiñ tishna-lab-e-bāda

gardish meñ hai paimāna paimāne se kyā kahiye

yuuñ sham.a pe jhuk paḌnā hai sham.a kī rusvā.ī

suntā nahīñ parvāna parvāne se kyā kahiye

duniyā se ik afsāna kahne ko the phir sochā

duniyā hai ḳhud afsāna afsāne se kyā kahiye

'sīmāb' kī sarmastī aur ġham-kada-e-hastī

dīvāna hai dīvāna dīvāne se kyā kahiye

saqi hua begana begane se kya kahiye

be-kaifi-e-mai-KHana maiKHane se kya kahiye

kya us ko nahin malum aashuftagiyan meri

nairangi-e-virana virane se kya kahiye

takbi-e-wafa sun kar KHamosh hain but lekin

pur-shor hai but-KHana but-KHane se kya kahiye

hum talKHi-e-qismat se hain tishna-lab-e-baada

gardish mein hai paimana paimane se kya kahiye

yun shama pe jhuk paDna hai shama ki ruswai

sunta nahin parwana parwane se kya kahiye

duniya se ek afsana kahne ko the phir socha

duniya hai KHud afsana afsane se kya kahiye

'simab' ki sarmasti aur gham-kada-e-hasti

diwana hai diwana diwane se kya kahiye