saya-afagan ho jo wo zulf-e-moambar aag mein

sāya-afagan ho jo vo zulf-e-mo.ambar aag meñ

dūd-e-pechāñ ban ke sumbul ho mo.attar aag meñ

kaam parvāna kā jal jaanā hai uḌ kar aag meñ

muñh hai kyā ai sham.a jo maare magas par aag meñ

rizq donoñ ko hī pahuñchātā hai vo rozī-rasāñ

aab meñ rahtī hai maahī aur samandar aag meñ

mujh ko sūjhe hai ki tū ātish-e-ḳhūñ se mil ke aah

jhoñk degā ek din ai dil muqarrar aag meñ

dekhe tabḳhāle vo aa kar aḳhgar-e-lab par tire

gar na dekhe ho kisī ne kān-e-gauhar aag meñ

ātish-e-dozaḳh kā ham tar-dāmanoñ ko kyā hai ḳhauf

vā.izā jaltī nahīñ hai haizam-e-tar aag meñ

taptī hai yak jur.a-e-mai ho gayā siina kabāb

farq kyā is aab meñ hai aur dilbar aag meñ

Dhaak hai jañgal meñ phūlā yā tire aahoñ se qais

jal rahe haiñ yak-qalam ashjār-e-be-bar aag meñ

ātishī shīshe meñ saaqī bāda-e-gulnār bhar

kyā ajab ātish mire kā ho guzar gar aag meñ

tafta-jāñ mar kar tire go sīm-tan miTTī hue

to bhī par jalte haiñ ban kar kūrah-zargar aag meñ

kyuuñ na TuuTe chaak par girdāb ke jām-e-habāb

sāqiyā hotā hai puḳhta rah ke sāġhar aag meñ

kah do us mutrib-pisar se nāla-e-dīpak-asar

khīñch kar chaltā hai koī terā muztar aag meñ

mom-āsā ishq ne terā hī dil pighlā diyā

ho gayā āḳhir ko paanī dekh patthar aag meñ

aur kar tahrīr garm us se ġhazal ab ai 'nasīr'

tā-suḳhan-chīñ ḳhaak hoñ juuñ sham.a jal kar aag meñ

saya-afagan ho jo wo zulf-e-moambar aag mein

dud-e-pechan ban ke sumbul ho moattar aag mein

kaam parwana ka jal jaana hai uD kar aag mein

munh hai kya ai shama jo mare magas par aag mein

rizq donon ko hi pahunchata hai wo rozi-rasan

aab mein rahti hai mahi aur samandar aag mein

mujh ko sujhe hai ki tu aatish-e-KHun se mil ke aah

jhonk dega ek din ai dil muqarrar aag mein

dekhe tabKHale wo aa kar aKHgar-e-lab par tere

gar na dekhe ho kisi ne kan-e-gauhar aag mein

aatish-e-dozaKH ka hum tar-damanon ko kya hai KHauf

waiza jalti nahin hai haizam-e-tar aag mein

tapti hai yak jura-e-mai ho gaya sina kabab

farq kya is aab mein hai aur dilbar aag mein

Dhak hai jangal mein phula ya tere aahon se qais

jal rahe hain yak-qalam ashjar-e-be-bar aag mein

aatishi shishe mein saqi baada-e-gulnar bhar

kya ajab aatish mere ka ho guzar gar aag mein

tafta-jaan mar kar tere go sim-tan miTTi hue

to bhi par jalte hain ban kar kurah-zargar aag mein

kyun na TuTe chaak par girdab ke jam-e-habab

saqiya hota hai puKHta rah ke saghar aag mein

kah do us mutrib-pisar se nala-e-dipak-asar

khinch kar chalta hai koi tera muztar aag mein

mom-asa ishq ne tera hi dil pighla diya

ho gaya aaKHir ko pani dekh patthar aag mein

aur kar tahrir garm us se ghazal ab ai 'nasir'

ta-suKHan-chin KHak hon jun shama jal kar aag mein