sab ko uljhae hue hai zulf-e-pechan in dinon

sab ko uljhā.e hue hai zulf-e-pechāñ in dinoñ

kaun suntā hai mirā hāl-e-pareshāñ in dinoñ

ho rahā huuñ mahv-e-dīd-e-rū-e-jānāñ in dinoñ

kyuuñ na huuñ phir sūrat-e-ā.īna hairāñ in dinoñ

mus.haf-e-ruḳh nūr-fshānī se baizāvī huā

ho ga.e kyā muttahid tafsīr-o-qur.āñ in dinoñ

sāhat-e-dil ā.īna hai aur āñkheñ dūrbīñ

kyuuñ nazar aatā nahīñ phir rū-e-jānāñ in dinoñ

rāt-din goshe meñ kab tak ishaq-e-lailā-e-jamāl

ban ke majnūñ kījiye sair-e-bayābāñ in dinoñ

ab sikandar-pūr rashk-e-ḳhitta-e-shīrāz hai

laa.e haiñ tashrīf ustād-e-suḳhan-dāñ in dinoñ

lucknow kī shā.irī mansūḳh hai is daur meñ

rashk-e-'nāsiḳh' hai har ik tifl-e-dabistāñ in dinoñ

shā.erān-e-dahr ko ab hai pareshānī nasīb

karte haiñ ustād 'akmal' jam.a dīvāñ in dinoñ

ik jagah rahne nahīñ detī zamāne kī havā

ho rahā huuñ misl-e-aurāq-e-pareshāñ in dinoñ

rāt-din 'ājiz'-navāzī un ko ab manzūr hai

kyuuñ na ho phir basta-e-zanjīr-e-ehsāñ in dinoñ

sab ko uljhae hue hai zulf-e-pechan in dinon

kaun sunta hai mera haal-e-pareshan in dinon

ho raha hun mahw-e-did-e-ru-e-jaanan in dinon

kyun na hun phir surat-e-aina hairan in dinon

mushaf-e-ruKH nur-fshani se baizawi hua

ho gae kya muttahid tafsir-o-quran in dinon

sahat-e-dil aaina hai aur aankhen durbin

kyun nazar aata nahin phir ru-e-jaanan in dinon

raat-din goshe mein kab tak ishaq-e-laila-e-jamal

ban ke majnun kijiye sair-e-bayaban in dinon

ab sikandar-pur rashk-e-KHitta-e-shiraaz hai

lae hain tashrif ustad-e-suKHan-dan in dinon

lucknow ki shairi mansuKH hai is daur mein

rashk-e-'nasiKH' hai har ek tifl-e-dabistan in dinon

shaeran-e-dahr ko ab hai pareshani nasib

karte hain ustad 'akmal' jama diwan in dinon

ek jagah rahne nahin deti zamane ki hawa

ho raha hun misl-e-auraq-e-pareshan in dinon

raat-din 'ajiz'-nawazi un ko ab manzur hai

kyun na ho phir basta-e-zanjir-e-ehsan in dinon