har gali aabaad hai har aastan aabaad hai

har galī ābād hai har āstāñ ābād hai

aap hī se jān-e-jāñ saarā jahāñ ābād hai

ābiyārī ham ne kī hai is zamīñ kī ḳhuun se

aaj tak jis par hamārā ḳhāndāñ ābād hai

ghar re’āyā ke girā.e jā rahe haiñ din-ba-din

saltanat meñ hākim-e-nā-mehrbāñ ābād hai

fasl-e-gul kyuuñ kar na us meñ lahlahā.egī janāb

aap kī ulfat kā dil meñ gulistāñ ābād hai

is liye lagtā hai ham ko ghar hamārā ḳhuld sā

shādmāñ hai baap is meñ aur maañ ābād hai

vo to ham hī log haiñ jin ke sabab 'nāzāñ' miyāñ

ye zamīñ ābād hai aur āsmāñ ābād hai

har gali aabaad hai har aastan aabaad hai

aap hi se jaan-e-jaan sara jahan aabaad hai

aabiyari hum ne ki hai is zamin ki KHun se

aaj tak jis par hamara KHandan aabaad hai

ghar re’aya ke girae ja rahe hain din-ba-din

saltanat mein hakim-e-na-mehrban aabaad hai

fasl-e-gul kyun kar na us mein lahlahaegi janab

aap ki ulfat ka dil mein gulistan aabaad hai

is liye lagta hai hum ko ghar hamara KHuld sa

shadman hai bap is mein aur man aabaad hai

wo to hum hi log hain jin ke sabab 'nazan' miyan

ye zamin aabaad hai aur aasman aabaad hai