dil phansa kar zulf mein KHud hai pashemani mujhe

dil phañsā kar zulf meñ ḳhud hai pashemānī mujhe

dahr meñ ḳhalq-e-ḳhudā kahtī hai zindānī mujhe

khīñch kar jis din se dikhlā.ī hai tasvīr aap kī

mānte us din se haiñ bahzād aur maanī mujhe

jaan kā kuchh ḳhauf jāñbāzān-e-ulfat ko nahīñ

aap dikhlāte haiñ kyuuñ teġh-e-sifā-hānī mujhe

us kī yaktā.ī kā da.ava kis tarah bātil karūñ

jiskā 'ālam meñ nazar aatā nahīñ saanī mujhe

dil meñ aatā hai ki fauran zahr khā luuñ hijr meñ

yaad aa jaatī hai jab poshāk vo dhānī mujhe

vahshat-e-dil le chale phir jānib-e-dasht-e-junūñ

kah do aa.eñ dekhne ġhūl-e-bayābānī mujhe

kis parī-vash kā huuñ saudā.ī jo ye 'ālam huā

ab to pariyāñ bhī nazar aatī haiñ dīvānī mujhe

ātish-e-furqat se 'sādiq' ābalā-tan ho gayā

qabr meñ rakhnā pas-e-murdan ba-āsānī mujhe

dil phansa kar zulf mein KHud hai pashemani mujhe

dahr mein KHalq-e-KHuda kahti hai zindani mujhe

khinch kar jis din se dikhlai hai taswir aap ki

mante us din se hain bahzad aur mani mujhe

jaan ka kuchh KHauf jaanbazan-e-ulfat ko nahin

aap dikhlate hain kyun tegh-e-sifa-hani mujhe

us ki yaktai ka dawa kis tarah baatil karun

jiska 'alam mein nazar aata nahin sani mujhe

dil mein aata hai ki fauran zahr kha lun hijr mein

yaad aa jati hai jab poshak wo dhani mujhe

wahshat-e-dil le chale phir jaanib-e-dasht-e-junun

kah do aaen dekhne ghul-e-bayabani mujhe

kis pari-wash ka hun saudai jo ye 'alam hua

ab to pariyan bhi nazar aati hain diwani mujhe

aatish-e-furqat se 'sadiq' aabala-tan ho gaya

qabr mein rakhna pas-e-murdan ba-asani mujhe