hijr-e-asar tha ek shahar tah-e-dil na raha

hijr-e-āsār thā ik shahar tah-e-dil na rahā

aa ga.e tum to koī chaah ke qābil na rahā

vaqt kī kaun sī jahtoñ meñ tujhe DhūñDtī maiñ

kahkashāñ dil na huī ishq dar-e-dil na rahā

mil ki ab jaake muyassar huī puurī ḳhalvat

aa ki ab dasht-e-badan biich meñ haa.il na rahā

jām-e-dardish meñ usī jur-e'-be-nām se the

chashm-e-sāqī jo bujhī nashha-e-mahfil na rahā

ḳhaak uḌāne ko kahāñ jaaye badan kī miTTī

dil hī jab jism ke āzār meñ shāmil na rahā

us ke dekhe se damak uThī purānī tasvīr

’aks-e-ḳhud bol uThe ā.īna ghā.il na rahā

tīsre ishq ne zinda kiyā āḳhir mujh ko

vo jo ik marhala-dār thā mushkil na rahā

hijr-e-asar tha ek shahar tah-e-dil na raha

aa gae tum to koi chah ke qabil na raha

waqt ki kaun si jahton mein tujhe DhunDti main

kahkashan dil na hui ishq dar-e-dil na raha

mil ki ab jake muyassar hui puri KHalwat

aa ki ab dasht-e-badan bich mein hail na raha

jam-e-dardish mein usi jur-e'-be-nam se the

chashm-e-saqi jo bujhi nashha-e-mahfil na raha

KHak uDane ko kahan jaye badan ki miTTi

dil hi jab jism ke aazar mein shamil na raha

us ke dekhe se damak uThi purani taswir

’aks-e-KHud bol uThe aaina ghail na raha

tisre ishq ne zinda kiya aaKHir mujh ko

wo jo ek marhala-dar tha mushkil na raha