ai mere mah-ru teri chasm-e-sitara san ke baad

ai mire māh-rū tirī chasm-e-sitāra saañ ke ba.ad

chāñd kī diid kyā kareñ rūyat-e-kahkashāñ ke ba.ad

band qabā-e-ārzū kholiye kis ke vāste

daur-e-subū kā lutf kyā ruḳhsat-e-mai-kashāñ ke ba.ad

kiije firāq se visāl kohna-sarā-e-ishq meñ

nazr guzāriye koī aur bhī naqd-e-jāñ ke ba.ad

ai mire dil dhaḌak na yuuñ TuuT na jaa.e ye fusūñ

bhed bhare haiñ rāste jāda-e-āsmāñ ke ba.ad

vo jo sunahrī dhuñd sī dekhte ho sar-e-ufuq

tum se mileñge ham vahīñ 'arsa-e-jism-o-jāñ ke ba.ad

chāhat-e-rā.igāñ talak tujh ko na yaad aa.e ham

ā.eñge yaad ham tujhe hāsil-e-rā.ingāñ ke ba.ad

shab ke sunahrī jaam meñ terī shabīh dekhte

khultā agar vo mai-kada raqs-e-sitār-gāñ ke ba.ad

ai mere mah-ru teri chasm-e-sitara san ke baad

chand ki did kya karen ruyat-e-kahkashan ke baad

band qaba-e-arzu kholiye kis ke waste

daur-e-subu ka lutf kya ruKHsat-e-mai-kashan ke baad

kije firaq se visal kohna-sara-e-ishq mein

nazr guzariye koi aur bhi naqd-e-jaan ke baad

ai mere dil dhaDak na yun TuT na jae ye fusun

bhed bhare hain raste jada-e-asman ke baad

wo jo sunahri dhund si dekhte ho sar-e-ufuq

tum se milenge hum wahin 'arsa-e-jism-o-jaan ke baad

chahat-e-raigan talak tujh ko na yaad aae hum

aaenge yaad hum tujhe hasil-e-raingan ke baad

shab ke sunahri jam mein teri shabih dekhte

khulta agar wo mai-kada raqs-e-sitar-gan ke baad