sambhal jao chaman walo KHatar hai hum na kahte the

sambhal jaao chaman vaalo ḳhatar hai ham na kahte the

jamāl-e-gul ke parde meñ sharar hai ham na kahte the

laboñ kī tishnagī ko zabt kā ik jaam kaafī hai

chhalaktā jaam zahr-e-kār-gar hai ham na kahte the

zamāna DhūñDhtā phirtā hai jis ko ik zamāne se

mohabbat kī vo ik pahlī nazar hai ham na kahte the

qayāmat aa ga.ī lekin vo aa.e haiñ na ā.eñge

shab-e-furqat kī kab koī sahar hai ham na kahte the

ġham-e-jānāñ ġham-e-ayyām ke sāñche meñ Dhaltā hai

ke ik ġham dūsre kā chāragar hai ham na kahte the

taḌaptī kauñdtī thī barq lahrātī machaltī thī

hamāre chaar tinkoñ par nazar hai ham na kahte the

ġhubār-e-rāh meñ kho jā.egā ye kārvāñ āḳhir

ke rahzan kārvāñ kā rāhbar hai ham na kahte the

nishān-e-manzil-e-maqsūd se āgāh the 'vāsif'

fareb-e-āgahī se kab mafar hai ham na kahte the

sambhal jao chaman walo KHatar hai hum na kahte the

jamal-e-gul ke parde mein sharar hai hum na kahte the

labon ki tishnagi ko zabt ka ek jam kafi hai

chhalakta jam zahr-e-kar-gar hai hum na kahte the

zamana DhunDhta phirta hai jis ko ek zamane se

mohabbat ki wo ek pahli nazar hai hum na kahte the

qayamat aa gai lekin wo aae hain na aaenge

shab-e-furqat ki kab koi sahar hai hum na kahte the

gham-e-jaanan gham-e-ayyam ke sanche mein Dhalta hai

ke ek gham dusre ka chaaragar hai hum na kahte the

taDapti kaundti thi barq lahraati machalti thi

hamare chaar tinkon par nazar hai hum na kahte the

ghubar-e-rah mein kho jaega ye karwan aaKHir

ke rahzan karwan ka rahbar hai hum na kahte the

nishan-e-manzil-e-maqsud se aagah the 'wasif'

fareb-e-agahi se kab mafar hai hum na kahte the