samjhaun hun yahi dil-e-nakaam ke tain

samjhā.ūñ huuñ yahī dil-e-nākām ke ta.iiñ

āġhāz bech soñch le anjām ke ta.iiñ

kyā jāvegā bigḌe kahīñ qudrat kā haath Tak

deve palaT jo gardish-e-ayyām ke ta.iiñ

saudā kare hai ġham kā jo bāzār-e-ishq biich

sau dukh ke bhaav bech hai ārām ke ta.iiñ

vaa.iz sunā de sidra-e-tūbā kī guftugū

ham chāheñ apne sarv-o-gul-andām ke ta.iiñ

bole hai shaiḳh mujh satī saaqī ko kah do tum

īdhar ko bhī baḌhāve kaso jaam ke ta.iiñ

bhāve nahīñ hai hai shaiḳh kī sohbat ye mai-kasho

baiThā do saath mat kaso badnām ke ta.iiñ

'sajjād' kaahe khīñche hai tū āh-e-nā-rasā

toḌe hai koī bhī samar-e-ḳhām ke ta.iiñ

samjhaun hun yahi dil-e-nakaam ke tain

aaghaz bech sonch le anjam ke tain

kya jawega bigDe kahin qudrat ka hath Tak

dewe palaT jo gardish-e-ayyam ke tain

sauda kare hai gham ka jo bazar-e-ishq bich

sau dukh ke bhaw bech hai aaram ke tain

waiz suna de sidra-e-tuba ki guftugu

hum chahen apne sarw-o-gul-andam ke tain

bole hai shaiKH mujh sati saqi ko kah do tum

idhar ko bhi baDhawe kaso jam ke tain

bhawe nahin hai hai shaiKH ki sohbat ye mai-kasho

baiTha do sath mat kaso badnam ke tain

'sajjad' kahe khinche hai tu aah-e-na-rasa

toDe hai koi bhi samar-e-KHam ke tain