nala ai bulbul na kar charKH-e-kuhan jal jaega

naala ai bulbul na kar charḳh-e-kuhan jal jā.egā

aag lag jā.egī duniyā meñ chaman jal jā.egā

garm aaheñ khīñch ai majnūñ samajh kar dasht meñ

saath sahrā ke tirā dīvānāpan jal jā.egā

rañg lā.egā mirā soz-e-mohabbat qabr meñ

ustuḳhvāñ ho jā.egā sho.ale kafan jal jā.egā

ātish-e-ġham kī taraqqī hai jo roz afzūñ yahī

hai yaqīñ ik roz apnā tan-badan jal jā.egā

kyā ḳhabar thī be-basoñ par ishq barsā.egā aag

tesha ban jā.egā sho.ala kohkan jal jā.egā

maiñ na samjhā thā ki mujh ko dekh ke hogā tū aag

ḳhirman-e-armān-o-hasrat be-suḳhan jal jā.egā

'sanjar'-e-ātish zabāñ ko kyuuñ jalāte ho ki vo

sar-basar ḳhud sūrat-e-sham.a lagan jal jā.egā

nala ai bulbul na kar charKH-e-kuhan jal jaega

aag lag jaegi duniya mein chaman jal jaega

garm aahen khinch ai majnun samajh kar dasht mein

sath sahra ke tera diwanapan jal jaega

rang laega mera soz-e-mohabbat qabr mein

ustuKHwan ho jaega shoale kafan jal jaega

aatish-e-gham ki taraqqi hai jo roz afzun yahi

hai yaqin ek roz apna tan-badan jal jaega

kya KHabar thi be-bason par ishq barsaega aag

tesha ban jaega shoala kohkan jal jaega

main na samjha tha ki mujh ko dekh ke hoga tu aag

KHirman-e-arman-o-hasrat be-suKHan jal jaega

'sanjar'-e-atish zaban ko kyun jalate ho ki wo

sar-basar KHud surat-e-shama lagan jal jaega