sar-e-mai-KHana koi parsa ab tak nahin aaya

sar-e-mai-ḳhāna koī pārsā ab tak nahīñ aayā

hameñ piine pilāne kā mazā ab tak nahīñ aayā

kiyā va.ada magar vo be-vafā ab tak nahīñ aayā

ḳhudā ma.alūm kab tak aa.egā ab tak nahīñ aayā

falak kī gardisheñ hairāñ haiñ us kī be-misālī par

koī aisā sitamgar dūsrā ab tak nahīñ aayā

shabāb aayā hijāb aayā adā.eñ ā.ga.īñ un ko

nahīñ aayā to andāz-e-vafā ab tak nahīñ aayā

nigāheñ un kī uTThīñ ghūm-phir kar ġhair tak pahuñchīñ

mirī jānib koī tīr-e-qazā ab tak nahīñ aayā

tumhī ai ham-nashīno nāma-bar kī kuchh ḳhabar laao

zarā phir dekh lo ye kyā kahā ab tak nahīñ aayā

hazāroñ ko hai da.ava nā-ḳhudā.ī kā magar ham ko

nazar koī bhī sāhil āshnā ab tak nahīñ aayā

mire nazdīk to ’uzr-e-ḳhatā inkār-e-rahmat hai

ḳhatā-kāroñ ko andāz-e-ḳhatā ab tak nahīñ aayā

palaT kar aa nahīñ saktā adam kī raah se koī

ye duniyā chhoḌ kar jo bhī gayā ab tak nahīñ aayā

mire ġham-ḳhāna-e-hastī kī shab tārīk hai kitnī

koī jugnū koī raushan diyā ab tak nahīñ aayā

ye ik tum ho ki ik muddat se ham ko bhūle baiThe ho

ye ik ham haiñ ki ham ko bhūlnā ab tak nahīñ aayā

'nasīr' us ne dam-e-ruḳhsat na kyā kyā khaa.ī thiiñ qasmeñ

magar dekho zarā vo be-vafā ab tak nahīñ aayā

sar-e-mai-KHana koi parsa ab tak nahin aaya

hamein pine pilane ka maza ab tak nahin aaya

kiya wada magar wo be-wafa ab tak nahin aaya

KHuda malum kab tak aaega ab tak nahin aaya

falak ki gardishen hairan hain us ki be-misali par

koi aisa sitamgar dusra ab tak nahin aaya

shabab aaya hijab aaya adaen aagain un ko

nahin aaya to andaz-e-wafa ab tak nahin aaya

nigahen un ki uTThin ghum-phir kar ghair tak pahunchin

meri jaanib koi tir-e-qaza ab tak nahin aaya

tumhi ai ham-nashino nama-bar ki kuchh KHabar lao

zara phir dekh lo ye kya kaha ab tak nahin aaya

hazaron ko hai dawa na-KHudai ka magar hum ko

nazar koi bhi sahil aashna ab tak nahin aaya

mere nazdik to ’uzr-e-KHata inkar-e-rahmat hai

KHata-karon ko andaz-e-KHata ab tak nahin aaya

palaT kar aa nahin sakta adam ki rah se koi

ye duniya chhoD kar jo bhi gaya ab tak nahin aaya

mere gham-KHana-e-hasti ki shab tarik hai kitni

koi jugnu koi raushan diya ab tak nahin aaya

ye ek tum ho ki ek muddat se hum ko bhule baiThe ho

ye ek hum hain ki hum ko bhulna ab tak nahin aaya

'nasir' us ne dam-e-ruKHsat na kya kya khai thin qasmen

magar dekho zara wo be-wafa ab tak nahin aaya