sauda nazar ka dard jigar ka kahan gaya

saudā nazar kā dard jigar kā kahāñ gayā

ye āfateñ bhī saath ga.iiñ maiñ jahāñ gayā

sābit huā ye hai tirā andāz-e-mustaqil

dil se tirī nigāh-e-karam kā gumāñ gayā

tanhā.ī-e-firāq kā qissa fuzūl hai

jab tū gayā yañh se to saarā jahāñ gayā

ai yaas dasht hī ko jo manzil banāī.e

ab yād-e-kārvāñ hai abas kārvāñ gayā

pahchāntā hai merī nazar ko har ik hasīñ

mujh par balā.eñ TuuT paḌīñ maiñ jahāñ gayā

un kī nazar se kaun kahe dil kā mājrā

ai hairat-e-ḳharābī-e-dil maiñ kahāñ gayā

vo din ki jab thī sohbat-e-'maikash' surūr-e-dil

vo daur vo zamāna ab ai mehrbāñ gayā

sauda nazar ka dard jigar ka kahan gaya

ye aafaten bhi sath gain main jahan gaya

sabit hua ye hai tera andaz-e-mustaqil

dil se teri nigah-e-karam ka guman gaya

tanhai-e-firaq ka qissa fuzul hai

jab tu gaya yanh se to sara jahan gaya

ai yas dasht hi ko jo manzil banaie

ab yaad-e-karwan hai abas karwan gaya

pahchanta hai meri nazar ko har ek hasin

mujh par balaen TuT paDin main jahan gaya

un ki nazar se kaun kahe dil ka majra

ai hairat-e-KHarabi-e-dil main kahan gaya

wo din ki jab thi sohbat-e-'maikash' surur-e-dil

wo daur wo zamana ab ai mehrban gaya