سودا نظر کا درد جگر کا کہاں گیا

سودا نظر کا درد جگر کا کہاں گیا

یہ آفتیں بھی ساتھ گئیں میں جہاں گیا

ثابت ہوا یہ ہے ترا انداز مستقل

دل سے تری نگاہ کرم کا گماں گیا

تنہائی فراق کا قصہ فضول ہے

جب تو گیا یہاں سے تو سارا جہاں گیا

اے یاس دشت ہی کو جو منزل بنایئے

اب یاد کارواں ہے عبث کارواں گیا

پہچانتا ہے میری نظر کو ہر اک حسیں

مجھ پر بلائیں ٹوٹ پڑیں میں جہاں گیا

ان کی نظر سے کون کہے دل کا ماجرا

اے حیرت خرابی دل میں کہاں گیا

وہ دن کہ جب تھی صحبت میکشؔ سرور دل

وہ دور وہ زمانہ اب اے مہرباں گیا